മെഡിക്കല്‍ സാമഗ്രികളുടെ വില ഉയര്‍ത്തുന്നത് നിര്‍ത്തണം: ചൈനയോട് ഇന്ത്യ

ഓക്സിജൻ കോൺസെൻട്രേറ്ററുകൾ പോലുള്ള മെഡിക്കൽ സാമഗ്രികളുടെ വില കുതിച്ചുയരുന്നത് തടയണമെന്ന് ചൈനയോട് ഇന്ത്യ ആവശ്യപ്പെട്ടു.

ബീജിംഗ്: ചൈനീസ് നിർമ്മാതാക്കളിൽ നിന്ന് വാങ്ങുന്ന അവശ്യ മെഡിക്കല്‍ സാമഗ്രികളുടെ വില കുത്തനെ കൂട്ടുന്നത് നിര്‍ത്തണമെന്ന് ആവശ്യപ്പെട്ട് ഇന്ത്യ. രാജ്യത്ത് കൊവിഡ് രൂക്ഷമാകുന്ന സാഹചര്യത്തില്‍ കാർഗോ ഫ്ലൈറ്റ് സേവനങ്ങൾ സാധാരണ നിലയില്‍ പുനസ്ഥാപിക്കാനും ഇന്ത്യ ചൈനയോട് ആവശ്യപ്പെട്ടു. ഓക്സിജൻ കോൺസെൻട്രേറ്ററുകൾ പോലുള്ള മെഡിക്കൽ സാമഗ്രികളുടെ വില കുതിച്ചുയരുന്നതും ഇന്ത്യയിലേക്കുള്ള ചരക്ക് വിമാന സർവീസുകൾ തടസ്സപ്പെടുന്നതും മെഡിക്കൽ സാധനങ്ങളുടെ വരവ് മന്ദഗതിയിലാക്കുന്നുവെന്ന് ഹോങ്കോങ്ങിലെ ഇന്ത്യൻ പ്രതിനിധി ജനറൽ പ്രിയങ്ക ചൗഹാൻ പറഞ്ഞു.

കൊവിഡ് വ്യാപനം ചൂണ്ടിക്കാട്ടി ഏപ്രിൽ 26 മുതൽ സിചുവാൻ എയർലൈൻസിന്‍റെ 11 കാർഗോ ഫ്ലൈറ്റുകള്‍ 15 ദിവസത്തേക്ക് നിർത്തിവയ്ക്കാനുള്ള തീരുമാനമാണ് കാർഗോ ഫ്ലൈറ്റ് തടസ്സങ്ങൾ വർദ്ധിപ്പിച്ചത്. വിമാനങ്ങൾ പുന:സ്ഥാപിക്കാനുള്ള പദ്ധതികൾ അവലോകനം ചെയ്യുകയാണെന്ന് സർക്കാർ അറിയിച്ചിട്ടുണ്ടെങ്കിലും ഇത് വരെ നടന്നിട്ടില്ല. അതേസമയം സിചുവാൻ എയർലൈൻസിന്‍റെ മൂന്ന് ചരക്ക് സർവീസുകൾ ചോങ്‌കിംഗിൽ നിന്നും സിയാനിൽ നിന്നും ഡല്‍ഹിയിലേക്ക് മെയ് 17 മുതൽ പുന:സ്ഥാപിക്കാനുള്ള പദ്ധതികൾ നടപ്പിലാക്കുന്നതായി ഷാങ്ഹായിലെ ഫ്രൈറ്റ് ഫോർ‌വേർ‌ഡേഴ്സ് പറഞ്ഞു. നിലവിൽ ചൈനയിൽ നിന്ന് വൈദ്യസഹായങ്ങൾ എത്തിക്കുന്നതിനായി ഇന്ത്യയിൽ നിന്ന് സ്പൈസ് ജെറ്റ്, ബ്ലൂ ഡാർട്ട് എന്നിവയുൾപ്പെടെ മറ്റ് വിമാനക്കമ്പനികള്‍ കാലി വിമാനങ്ങൾ അയക്കുകയാണ് ചെയ്യുന്നത്.

പൊതുജനാരോഗ്യം കണക്കിലെടുത്ത് ചൈന യാത്രാ വിലക്ക് ഏര്‍പ്പെടുത്തിയതിനെ അഭിനന്ദിക്കുന്നതായും എന്നാൽ ചരക്ക് സർവീസുകൾ സുഗമമാക്കാൻ ഇന്ത്യ ചൈനയോട് ആവശ്യപ്പെടുകയാണെന്നും ചൗഹാന്‍ പറഞ്ഞു. യുക്തിരഹിതമായ നിയന്ത്രണം ഒഴിവാക്കി, ഗതാഗത ബന്ധങ്ങൾ നിലനിർത്തണമെന്ന് അവര്‍ കൂട്ടിച്ചേര്‍ത്തു. ഏപ്രിലിൽ ചൈനീസ് വിദേശകാര്യ മന്ത്രി വാങ് യിയും ഇന്ത്യൻ വിദേശകാര്യമന്ത്രി എസ് ജയ്‌ശങ്കറും തമ്മില്‍ ഫോൺ സംഭാഷണം നടത്തിയിരുന്നു. ചരക്ക് വിമാനങ്ങളുടെ അനുമതിക്കും അംഗീകാരത്തിനും ഈ ചര്‍ച്ച സഹായിച്ചിരുന്നു. അതേസമയം 50ലധികം രാജ്യങ്ങള്‍ ഇതിനകം ഇന്ത്യയ്ക്ക് സഹായങ്ങളുമായി രംഗത്തെത്തിയിട്ടുണ്ട്. കൊവിഡ് രണ്ടാം തരംഗം വളരെ രൂക്ഷമായാണ് ഇന്ത്യയെ ബാധിച്ചത്. കഴിഞ്ഞ 24 മണിക്കൂറിനിടെ 3,62,727 പുതിയ കൊവിഡ് കേസുകളാണ് രാജ്യത്ത് റിപ്പോര്‍ട്ട് ചെയ്തിരിക്കുന്നത്. ഇതോടെ ആകെ കേസുകളുടെ എണ്ണം 2,37,03,665 ആയി. മരണസംഖ്യ 2,58,317 ആയി ഉയർന്നു. ഒറ്റ ദിനം 4,120 പേരാണ് രോഗം ബാധിച്ച് മരണപ്പെട്ടത്.