കാസര്‍കോട് റീപോളിങ് വേണമെന്ന് യുഡിഎഫ് - ചീഫ് ഇലക്ഷൻ ഓഫീസർ
90ശതമാനത്തില്‍ കൂടുതല്‍ പോളിങ് നടന്ന മണ്ഡലങ്ങളിലെല്ലാം റീപോളിങ് വേണമെന്നാണ് ആവശ്യം. യുഡിഎഫ് ജില്ല കലക്ടര്‍ക്ക് പരാതി നല്‍കി
കാസർകോട്: കാസർകോട് ലോക്സഭാ മണ്ഡലത്തിൽ റീപോളിംഗ് വേണമെന്ന ആവശ്യവുമായി യുഡിഎഫ്. മണ്ഡലത്തിലെ 110 ബൂത്തുകളിൽ റീ പോളിങ് വേണം എന്നാവശ്യപ്പെട്ട് യു ഡി എഫ് കലക്ടർക്ക് പരാതി നൽകി. 90 ശതമാനത്തില്‍ കൂടുതല്‍ പോളിങ് നടന്ന മണ്ഡലത്തിലെല്ലാം റീപോളിങ് വേണമെന്നാണ് ആവശ്യം.
രാജ്മോഹൻ ഉണ്ണിത്താന്റെ ചീഫ് ഇലക്ഷൻ ഓഫീസർ അഡ്വ. സി കെ ശ്രീധരനാണ് പരാതി നൽകിയത്. കാസര്‍കോട് പാർലമെന്‍റ് മണ്ഡലത്തിലെ കള്ളവോട്ട് ദൃശ്യങ്ങൾ പുറത്ത് വന്നതിന് പിന്നാലെയാണ് വരണാധികാരി കൂടിയായ ജില്ലാ കലക്ടർക്ക് പരാതി ലഭിച്ചത്.
റീപോളിങ് നടക്കുമ്പോള്‍ കേന്ദ്രസേനയെ വിന്യസിക്കുന്നതിനൊപ്പം ഓരോ ബൂത്ത് കേന്ദ്രീകരിച്ചും ഒരു കേന്ദ്ര നിരീക്ഷകനെ നിയോഗിക്കണം. എൽ ഡി എഫിന്‍റെ ശക്തി കേന്ദ്രങ്ങളായ പയ്യന്നൂർ, കല്യാശ്ശേരി, തൃക്കരിപ്പൂർ നിയമസഭാ മണ്ഡലങ്ങളിലെ ബൂത്തുകളിലാണ് കള്ളവോട്ട് നടന്നിരിക്കുന്നതെന്നും പരാതിയില്‍ ആരോപിക്കുന്നു. കലക്ടര്‍ക്ക് നല്‍കിയ പരാതിയില്‍ പരിഹാരമില്ലെങ്കില്‍ നിയമനടപടിയിലേക്ക് നീങ്ങാനാണ് യുഡിഎഫിന്‍റെ തീരുമാനം.