കൊട്ടിയൂർ പീഡനം; അപ്പീല്‍ ഇന്ന് പരിഗണിക്കും
ഫാദർ റോബിന് വടക്കുംചേരി സമർപ്പിച്ച അപ്പീല്‍ ഹൈക്കോടതിയാണ് പരിഗണിക്കുക.
കൊട്ടിയൂർ പീഡനക്കേസിലെ ശിക്ഷ റദ്ദാക്കണമെന്നാവശ്യപ്പെട്ട് പ്രതി ഫാദർ റോബിന് വടക്കുംചേരി സമർപ്പിച്ച അപ്പീല്‍ ഹൈക്കോടതി ഇന്ന് പരിഗണിക്കും. പ്രായപൂർത്തിയാകാത്ത പ്ലസ് വണ്‍ വിദ്യാഥിയായ പെൺകുട്ടിയെ പീഡിപ്പിച്ചുവെന്ന പരാതിയില്‍ തെളിവുകൾ കെട്ടിച്ചമച്ചതാണെന്നും ഉഭയസമ്മതപ്രകാരമാണ് ബന്ധം നടന്നതെന്നും അപ്പീലില്‍ പറയുന്നു. പെൺകുട്ടിയുടെ പ്രായം ശാസ്ത്രീയമായി കണക്കാക്കണമെന്ന ആവശ്യം വിചാരണക്കോടതി പരിഗണിച്ചില്ലെന്നും അപ്പീലില്‍ പറയുന്നു. കേസില്‍ 20 വർഷം കഠിനതടവും മൂന്നുലക്ഷം രൂപ പിഴയുമാണ് തലശ്ശേരി കോടതി ഫാദർ റോബിന് ശിക്ഷ വിധിച്ചിരിക്കുന്നത്. 2016 ലായിരുന്നു കേസിനാസ്പദമായ സംഭവം നടന്നത്. 2017ലാണ് റോബിൻ വടക്കുംചേരി അറസ്റ്റിലാകുന്നത്. കൊട്ടിയൂർ സെന്‍റ് സെബാസ്റ്റ്യൻ പള്ളി വികാരി ആയിരിക്കെ ഫാദർ റോബിന് വടക്കുംചേരി പള്ളിയിലെത്തിയ പ്ലസ് വണ്‍ വിദ്യാര്‍ഥിയായ പെൺകുട്ടിയെ പീഡിപ്പിച്ചു. പെൺകുട്ടി പ്രസവിച്ച കു‍ഞ്ഞിനെ അനാഥാലയത്തിലേക്ക് മാറ്റുകയും വിവരം പുറത്തറയാതിരിക്കാൻ വൈദികൻ പണം വാഗ്ദാനം ചെയ്യുകയും ചെയ്തു. എന്നാൽ പെൺകുട്ടിയുടെ അമ്മ പരാതിയുമായി വന്നതോടയാണ് വിവരം പുറംലോകമറിഞ്ഞത്. പെൺകുട്ടി പ്രസവിച്ചത് ഫാദർ റോബിൻ വടക്കുംചേരിയുടെ കുഞ്ഞിനെയാണെന്ന് പിന്നീട് ഡിഎൻഎ പരിശോധനയിലൂടെ വ്യക്തമാകുകയും ചെയ്തു.