ബുക്കിങ് ഏജൻസികൾക്കെതിരെ നടപടിയുമായി സർക്കാർ

ഒരാഴ്ചക്കുള്ളിൽ ലൈസൻസ് ഇല്ലാത്ത ഏജന്‍സികള്‍ ലൈസൻസ് എടുക്കണമെന്ന് ഗതാഗത കമ്മീഷണർ ക‌ർശന നിർദ്ദേശം നൽകി

തിരുവനന്തപുരം: തിരുവനന്തപുരം, കോഴിക്കോട് എന്നിവടങ്ങളിലെ ദീർഘദൂര സ്വകാര്യ ബസുകളുടെ ഓഫീസിൽ ആർ ടി ഒ എൻഫോഴ്സ്മെന്റ് പരിശോധന നടത്തി. കോഴിക്കോട് പാളയം എംഎം അലി റോഡിലെ ദീർഘദൂര സ്വകാര്യ ബസുകളുടെ ഓഫീസിൽ രാത്രി എട്ട് മണിയോടെയാണ് ആർ ടി ഒ എൻഫോഴ്സ്മെൻറ് ഉദ്യോഗസ്ഥർ എത്തി പരിശോധന നടത്തിയത്. സംസ്ഥാനത്ത് ലൈസൻസ് ഇല്ലാതെ പ്രവർ‍ത്തിക്കുന്ന എല്ലാ ബുക്കിംഗ് ഏജൻസികൾക്കും മോട്ടോർ വാഹന വകുപ്പ് നോട്ടീസ് നൽകി. ഒരാഴ്ചക്കുള്ളിൽ ലൈസൻസ് എടുക്കണമെന്ന് ഗതാഗത കമ്മീഷണർ ഏജൻസികൾക്ക് ക‌ർശന നിർദ്ദേശം നൽകിയിട്ടുണ്ട്.

ലൈസൻസ് ഇല്ലാതെ പ്രവർത്തിക്കുന്ന 23 ബസുകൾക്കെതിരെ ഇതുവരെ നടപടി എടുത്തതായും ഗതാഗത കമ്മീഷണർ അറിയിച്ചു. പെർമിറ്റ് ചട്ടം ലംഘിച്ച വാഹനങ്ങൾക്ക് 5000 രൂപ പിഴ ചുമത്തിയിട്ടുണ്ട്. ഓപ്പറേഷൻ നെറ്റ് റൈഡിന്റെ ഭാഗമായി അമിത നിരക്ക് ഈടാക്കൽ സാധനങ്ങൾ കടത്തൽ എന്നിവക്ക് കല്ലട ട്രാവൽസിന്‍റെ മൂന്ന് വാഹനങ്ങൾക്കും പിഴ ചുമത്തിയിട്ടുണ്ട്. കല്ലട ബസിലെ യാത്രക്കാരനെ ജീവനക്കാര്‍ മര്‍ദ്ദിച്ച സംഭവത്തിന് പിന്നാലെ അനധികൃത സര്‍വ്വീസുകള്‍ നടത്തുന്ന അന്തർ സംസ്ഥാന ബസുകൾക്കെതിരെ മോട്ടോർ വാഹന വകുപ്പ് ആരംഭിച്ച നടപടിയാണ് ഓപ്പറേഷൻ നൈറ്റ് റൈഡേഴ്സ്. ഇതിനായി ജിഎസ്‍ടി വകുപ്പുമായി ചേർന്നാണ് മോട്ടോർ വാഹന വകുപ്പ് പരിശോധന നടത്തുന്നത്.