video: വെള്ളച്ചാട്ടത്തിന് മുകളില്‍ വീഡിയോയ്‌ക്ക് പോസ് ചെയ്യുന്നതിനിടെ അപകടം; യുവാവിനായി തെരച്ചില്‍ തുടരുന്നു

വീഡിയോയ്‌ക്ക് പോസ് ചെയ്യുന്നതിനിടെ കാല്‍ വഴുതിയാണ് യുവാവ് ദിണ്ടിഗല്‍ പുല്ലവേലി വെള്ളച്ചാട്ടത്തിലേക്ക് വീണത്.

ദിണ്ടിഗൽ (തമിഴ്‌നാട്):വെള്ളച്ചാട്ടത്തിനരികില്‍ നിന്ന് വീഡിയോയ്‌ക്ക് പോസ് ചെയ്യവെ കാല്‍ വഴുതി വെള്ളച്ചാട്ടത്തിലേക്ക് വീണ യുവാവിനായുള്ള തെരച്ചില്‍ തുടരുന്നു. ദിണ്ടിഗല്‍ പുല്ലവേലി വെള്ളച്ചാട്ടത്തില്‍ ഇന്നലെ (03.08.2022) ആണ് അപകടമുണ്ടായത്. അജയ് പാണ്ഡ്യൻ എന്ന യുവാവാണ് വെള്ളച്ചാട്ടത്തിലേക്ക് വീണത്.

സുഹൃത്തിനോട് വീഡിയോ പകര്‍ത്താന്‍ ആവശ്യപ്പെട്ട് അജയ് വെള്ളച്ചാട്ടത്തിനടുത്തേക്ക് പോയതായിരുന്നു. പോസ് ചെയ്യുന്നതിനിടെ കാല്‍ വഴുതി അജയ് വെള്ളച്ചാട്ടത്തിലേക്ക് വീണു. സുഹൃത്ത് ബഹളം വച്ചതിനെ തുടര്‍ന്ന് വിനോദ സഞ്ചാരികള്‍ പൊലീസിനെയും ഫയര്‍ഫോഴ്‌സിനെയും വിവരം അറിയിച്ചു.

പൊലീസും ഫയർഫോഴ്‌സും സംഭവസ്ഥലത്തെത്തി അഞ്ച് മണിക്കൂറിലേറെ തെരച്ചിൽ നടത്തിയെങ്കിലും അജയ് പാണ്ഡ്യനെ കണ്ടെത്താനായില്ല. ഇയാള്‍ക്കായുള്ള തെരച്ചില്‍ ഇന്നും തുടരുകയാണ്. സംഭവത്തില്‍ താണ്ടികുടി പൊലീസ് കേസെടുത്ത് അന്വേഷണം ആരംഭിച്ചു.

പ്രദേശത്ത് മഴ പെയ്‌തിരുന്നതിനാല്‍ പുഴയില്‍ ഒഴുക്ക് ശക്തമായിരുന്നു. സുഹൃത്ത് പകര്‍ത്തിയ അജയ് പാണ്ഡ്യൻ വെള്ളച്ചാട്ടത്തിലേക്ക് വീഴുന്നതിന്‍റെ ഞെട്ടിക്കുന്ന ദൃശ്യങ്ങള്‍ ഇപ്പോൾ സോഷ്യൽ മീഡിയയിൽ ചർച്ചയാണ്.