മുംബൈ (മഹാരാഷ്ട്ര): ബോളിവുഡ് ക്യൂട്ട് താരം കാർത്തിക് ആര്യന്‍റെ ബ്ലോക്ക്ബസ്‌റ്റര്‍ ഹൊറർ കോമഡി ചിത്രം 'ഭൂൽ ഭുലയ്യ 2' ന്‍റെ സൗത്ത് റീമേക്കിൽ തെന്നിന്ത്യന്‍ സൂപ്പര്‍ താരം നാഗചൈതന്യ അഭിനയിക്കുമെന്ന് അടുത്തിടെ റിപ്പോര്‍ട്ടുകള്‍ പ്രചരിച്ചിരുന്നു. ഇപ്പോഴിതാ ഇക്കാര്യത്തില്‍ വ്യക്തത വരുത്തിയിരിക്കുകയാണ് നടന്‍റെ ടീം. 'ഭൂൽ ഭുലയ്യ 2' റീമേക്കില്‍ നാഗ ചൈതന്യ പ്രത്യക്ഷപ്പെടുമെന്ന റിപ്പോര്‍ട്ടുകള്‍ താരത്തിന്‍റെ ടീം നിഷേധിച്ചു.
തെന്നിന്ത്യന്‍ താരസുന്ദരി ജ്യോതിക നായികയായെത്തുന്ന ചിത്രത്തിന്‍റെ സൗത്ത് റീമേക്കിൽ നാഗ ചൈതന്യ അഭിനയിക്കുന്നു എന്ന അഭ്യൂഹങ്ങളോട് നാഗ ചൈതന്യയുടെ ടീം സോഷ്യൽ മീഡിയയിലൂടെയാണ് പ്രതികരിച്ചത്. 'വസ്‌തുത പരിശോധിക്കുക: ഭൂൽ ഭുലയ്യ 2 റീമേക്കില്‍ നാഗചൈതന്യ അഭിനയിക്കുമെന്ന് പ്രചരിക്കുന്ന വാര്‍ത്തകള്‍ തികച്ചും തെറ്റാണ്.' -ഇപ്രകാരമാണ് നാഗചൈതന്യയുടെ ടീം ട്വിറ്ററില്‍ കുറിച്ചത്.
അനീസ് ബസ്‌മി സംവിധാനം ചെയ്‌ത 'ഭൂൽ ഭുലയ്യ 2'ല്‍, കാർത്തിക് ആര്യൻ, കിയാര അദ്വാനി, തബു എന്നിവരാണ് പ്രധാന വേഷങ്ങളിൽ എത്തിയത്. ചിത്രത്തിന് പ്രേക്ഷകരിൽ നിന്നും മികച്ച പ്രതികരണങ്ങളാണ് ലഭിച്ചത്. കൂടാതെ പരേഷ് റാവൽ, രാജ്‌പാല്‍ യാദവ്, അശ്വിനി കൽസേക്കർ, സഞ്ജയ് മിശ്ര തുടങ്ങിയവരും മികച്ച റോളുകളില്‍ എത്തിയിരുന്നു.
അതേസമയം കഴിഞ്ഞ വര്‍ഷം (2022ല്‍) ആയിരുന്നു നാഗ ചൈതന്യയുടെ ബോളിവുഡ് അരങ്ങേറ്റം. ആമിർ ഖാന്‍ നായകനായെത്തിയ 'ലാൽ സിംഗ് ഛദ്ദ' ആയിരുന്നു നാഗ ചൈതന്യയുടെ ആദ്യ ബോളിവുഡ് ചിത്രം. അദ്വൈത് ചൗഹാൻ സംവിധാനം ചെയ്‌ത ചിത്രത്തിൽ കരീന കപൂർ കപൂര്‍ ഖാന്‍ ആയിരുന്നു ആമിര്‍ ഖാന്‍റെ നായികയായെത്തിയത്. വലിയ ഹൈപ്പുകളോടെ തിയേറ്ററുകളില്‍ എത്തിയ ചിത്രത്തിന് ബോക്‌സോഫിസിൽ മികച്ച വിജയം നേടാനോ തിയേറ്ററുകളില്‍ പ്രേക്ഷകരെ പിടിച്ചിരുത്താനോ കഴിഞ്ഞില്ല.