കൊല്‍ക്കത്ത: പശ്ചിമ ബംഗാൾ ഗവർണർ ജഗദീപ് ധൻഖർ ബുധനാഴ്‌ച ന്യൂഡൽഹി സന്ദർശിക്കും. പ്രതിപക്ഷ നേതാവ് സുവേന്ദു അധികാരിയുമായി കൂടിക്കാഴ്‌ച നടന്നതിന് പിന്നാലെയാണ് ഗവര്‍ണര്‍ രാജ്യ തലസ്ഥാനം സന്ദര്‍ശിക്കാന്‍ ഒരുങ്ങുന്നത്. ജൂൺ 15ന് വൈകിട്ട് ഡല്‍ഹിയിലേക്ക് പുറപ്പെട്ട് വെള്ളിയാഴ്‌ച കൊൽക്കത്തയിലേക്ക് മടങ്ങുമെന്ന് ഗവർണർ ട്വീറ്റ് ചെയ്‌തു.
കഴിഞ്ഞ ദിവസം പ്രതിപക്ഷ നേതാവ് സുവേന്ദു അധികാരിയും 50 ബിജെപി എംഎൽഎമാരും ഗവര്‍ണറുമായി കൂടിക്കാഴ്‌ച നടത്തിയിരുന്നു. നിയമസഭ തെരഞ്ഞെടുപ്പിന് ശേഷമുള്ള സംസ്ഥാനത്തെ ക്രമ സമാധാന നില സംബന്ധിച്ച് ഗവർണർക്ക് നിവേദനം സമര്‍പ്പിക്കുകയും ചെയ്‌തു. കൂറുമാറ്റ നിരോധന നിയമം, തില്‍ജാല, ചന്ദന്‍നഗര്‍ എന്നിവിടങ്ങളിലെ അക്രമ സംഭവങ്ങള്‍ ഉള്‍പ്പെടെയുള്ള വിഷയങ്ങള്‍ ചൂണ്ടികാട്ടിയാണ് നിവേദനം സമര്‍പ്പിച്ചത്.