ന്യൂഡൽഹി : യമുന നദിയിലെ ജലനിരപ്പ് ക്രമാതീതമായി അപകടരേഖയ്ക്ക് മുകളിലേക്ക് ഉയരുന്നു. ചൊവ്വാഴ്‌ച വൈകിട്ട് 6 മണിയോടെ ഡൽഹിയിലെ പഴയ റെയിൽവേ പാലത്തിലെ ജലനിരപ്പ് 204.94 മീറ്ററായിരുന്നു. ഇത് 205.39 മീറ്ററിലെത്തി. സെൻട്രൽ വാട്ടർ കമ്മിഷന്‍റെ കണക്കുകൾ പ്രകാരം ഇന്നലെ (ഓഗസ്റ്റ് 15) രാത്രി 10 മണിയോടെയാണ് ജലനിരപ്പ് 205.33 മീറ്ററിൽ നിന്ന് 205.39 മീറ്ററിലെത്തിയത്.
ഉത്തരാഖണ്ഡിലും ഹിമാചൽ പ്രദേശിലും ഉണ്ടായ കനത്ത മഴയെ തുടര്‍ന്നാണ് നദിയിലെ ജലനിരപ്പ് അതിവേഗം ഉയര്‍ന്നത്. ഡൽഹിയിൽ ഉച്ചകഴിഞ്ഞ് മൂന്ന് മണിയോടെ യമുനയുടെ ജലനിരപ്പ് അപായ നില കടന്നത് 204.57 മീറ്ററായി ഉയർന്നതായും സെൻട്രൽ വാട്ടർ കമ്മിഷന്‍ അറിയിച്ചു. 204.5 മീറ്ററാണ് അപായ നില. ബുധനാഴ്‌ച (ഓഗസ്റ്റ് 16) പുലർച്ചെ അഞ്ച് മണിയോടെ ജലനിരപ്പ് 205 മീറ്ററായി ഉയര്‍ന്നേക്കാമെന്ന് സെൻട്രൽ വാട്ടർ കമ്മിഷൻ വ്യക്തമാക്കിയിരുന്നു.
കഴിഞ്ഞ മാസം ഡല്‍ഹിയില്‍ ഉണ്ടായ കനത്ത മഴയെ തുടര്‍ന്ന് ദേശീയ തലസ്ഥാനത്തെ പല പ്രദേശങ്ങളിലും വെള്ളപ്പൊക്കം റിപ്പോര്‍ട്ട് ചെയ്‌തിരുന്നു. ജൂലൈ 13 ന് യമുന നദിയുടെ ജലനിരപ്പ് 208.66 മീറ്റര്‍ ആയിരുന്നു. ഇതുവരെ രേഖപ്പെടുത്തിയിട്ടുള്ളവയില്‍ വച്ച് ഏറ്റവും ഉയർന്ന ജലനിരപ്പാണ് രേഖപ്പെടുത്തിയത്.
ഉത്തരാഖണ്ഡിലെയും ഹിമാചൽ പ്രദേശിലെയും ചില ഭാഗങ്ങളില്‍ മഴ കനത്തതോടെയാണ് യമുന നദിയുടെ ജലനിരപ്പ് ക്രമാതീതമായി ഉയര്‍ന്നു കൊണ്ടിരിക്കുന്നത്. ഹിമാചൽ പ്രദേശിൽ കഴിഞ്ഞ ദിവസങ്ങളിലായി തുടർച്ചയായി പെയ്‌തുകൊണ്ടിരിക്കുന്ന മഴ കനത്ത നാശനഷ്‌ടങ്ങളാണ് ഉണ്ടാക്കിയത്. ഉത്തരാഖണ്ഡിലെ കനത്ത മഴയെ തുടർന്ന് സംസ്ഥാനത്തെ പലയിടങ്ങളും വെള്ളത്തിനടിയിലാണ്. മണ്ണിടിച്ചിലും റിപ്പോർട്ട് ചെയ്യുന്നുണ്ട്.