ന്യൂഡല്‍ഹി: പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തി അമേരിക്കന്‍ പ്രതിരോധ സെക്രട്ടറി ലോയിഡ് ജെ ഓസ്റ്റിന്‍. ഇരുരാജ്യങ്ങളുമായുള്ള തന്ത്രപ്രധാന ബന്ധം ശക്തിപ്പെടുത്തുന്നതിന് അമേരിക്കയ്ക്കുള്ള താത്പര്യം ലോയിഡ് പ്രധാനമന്ത്രിയെ അറിയിച്ചു. ഇന്തോ-പസഫിക് മേഖലയുടെ സുസ്ഥിരതയ്ക്കും അഭിവൃദ്ധിക്കും സൗഹൃദം വഴിവയ്ക്കുമെന്നും അദ്ദേഹം അഭിപ്രായപ്പെട്ടു.
അമേരിക്കന്‍ പ്രസിഡന്‍റ് ജോ ബൈഡന് ആശംസകളറിയിച്ച പ്രധാനമന്ത്രി പ്രതിരോധ മേഖലയിലടക്കം ഇരുരാജ്യങ്ങളും തമ്മിലുള്ള ബന്ധത്തിന്‍റെ പ്രാധാന്യം എടുത്തുകാട്ടി. രണ്ട് ജനാധിപത്യ രാജ്യങ്ങളും പങ്ക് വയ്ക്കുന്ന ബഹുസ്വരതയും മൂല്യങ്ങളുമാണ് സൗഹൃദത്തിന്‍റെ മൂല കാരണമെന്നും അദ്ദേഹം പറഞ്ഞു. ഇരുരാജ്യങ്ങളും തമ്മിലുള്ള തന്ത്രപ്രധാനമായ ബന്ധം ആഗോള നന്മയ്ക്കായിരിക്കുമെന്ന് കൂടിക്കാഴ്ചയ്ക്ക് ശേഷം നരേന്ദ്ര മോദി ട്വീറ്റ് ചെയ്തു.