കഴിഞ്ഞ കുറച്ച് ദിവസമായി നടന്‍ ചങ്കി പാണ്ഡെയുടെ സഹോദര പുത്രി അലന്ന പാണ്ഡെയുടെ വിവാഹമാണിപ്പോള്‍ സോഷ്യല്‍ മീഡിയയില്‍ വൈറലാവുന്നത്. അമേരിക്കന്‍ ഫോട്ടോഗ്രാഫറായ ഐവർ മക്രേയേയാണ് അലന്ന പാണ്ഡെ വിവാഹം കഴിച്ചത്. മാർച്ച് 16 ന് മുംബൈയിൽ കുടുംബാംഗങ്ങളുടെയും സുഹൃത്തുക്കളുടെയും സാന്നിധ്യത്തിലായിരുന്നു വിവാഹം.
ബോളിവുഡ് താരം അനന്യ പാണ്ഡെയുടെ നൃത്തച്ചുവടുകള്‍ മുതല്‍ സുഹാന ഖാന്‍റെ ക്യൂട്ട് ലുക്കുകള്‍ ഉള്‍പ്പെടെയുള്ള ഈ വിവാഹാഘോഷം നിമിഷ നേരം കൊണ്ട് സോഷ്യല്‍ മീഡിയയില്‍ തരംഗമായി. ഇപ്പോഴിതാ നമ്പദമ്പതികളായ അലന്നയേയും ഭര്‍ത്താവ് ഐവർ മക്രേയേയും വിവാഹത്തിനെത്തിയ ബോളിവുഡ് കിങ് ഖാന്‍ ഷാരൂഖ് ഖാന്‍റെ വീഡിയോയാണ് ആരാധകര്‍ ഏറ്റെടുത്തിരിക്കുന്നത്.
നടി അനന്യ പാണ്ഡെയുടെ കസിന്‍ അലന്ന പാണ്ഡെയുടെ വിവാഹ ചടങ്ങില്‍ നിരവധി ബോളിവുഡ് താരങ്ങള്‍ പങ്കെടുത്തിരുന്നു. ഷാരൂഖ് ഖാനും ഭാര്യ ഗൗരി ഖാനും വിവാഹാഘോഷത്തിന്‍റെ ഭാഗമായി. ചടങ്ങില്‍ പങ്കെടുക്കാനെത്തിയ ഷാരൂഖ് ഖാന്‍ വധൂവരന്മാരെ അനുഗ്രഹിച്ചു. ഇരുവരെയും ആലിംഗനം ചെയ്‌ത് അവരുടെ കവിളുകളില്‍ താരം ചുംബനം നല്‍കിയാണ് മടങ്ങിയത്.
അലന്ന തന്‍റെ യൂട്യൂബ് ചാനലിൽ വിവാഹാഘോഷത്തിന്‍റെ വീഡിയോ പങ്കുവച്ചിട്ടുണ്ട്. വിവാഹാഘോഷത്തില്‍ പങ്കെടുക്കാനെത്തിയ ഷാരൂഖ് ഖാനെ കാണുമ്പോള്‍ അലന്ന തന്‍റെ കൈകൾ നീട്ടുന്നതും താരത്തെ കെട്ടിപ്പിടിച്ച് അദ്ദേഹത്തിന്‍റെ ചെവിയിൽ സ്വകാര്യം പറയുന്നതും വീഡിയോയില്‍ കാണാം. വന്നതില്‍ നന്ദിയുണ്ടെന്നാണ് അനന്യ ഷാരൂഖിന്‍റെ ചെവിയില്‍ മന്ത്രിച്ചത്.
ഷാരൂഖ് ഖാന്‍റെ ഫാന്‍ പേജുകളിലും അലന്നയുടെ വിവാഹ ചടങ്ങിനെത്തിയ ഷാരൂഖ് ഖാന്‍റെയും ഭാര്യ ഗൗരി ഖാന്‍റെയും മറ്റ് സെലിബ്രിറ്റികളുടെയും വീഡിയോകള്‍ പ്രത്യക്ഷപ്പെട്ടിട്ടുണ്ട്. കറുത്ത നിറമുള്ള സ്യൂട്ട് ധരിച്ചാണ് ഷാരൂഖ് ചടങ്ങിനെത്തിയത്. അതേസമയം പച്ച നിറമുള്ള ഗൗണ്‍ ആണ് ഗൗരി ഖാന്‍ തിരഞ്ഞെടുത്തത്. കനേഡിയന്‍ ഗായകന്‍ എ പി ധില്ലന്‍റെ 'ദിൽ നു' എന്ന ഗാനത്തിന് ഇരുവരും ചുവടുകള്‍ വയ്‌ക്കുന്നതും വീഡിയോയില്‍ കാണാം.
അലന്നയുടെ അമ്മ ഡീന്‍ പാണ്ഡെയ്‌ക്കൊപ്പമാണ് ഷാരൂഖ് ഖാനും ഗൗരി ഖാനും നൃത്തം ചെയ്‌തത്. നടന്‍ ചങ്കി പാണ്ഡെയുടെ സഹോദരന്‍ ചിക്കി പാണ്ഡെയുടെയും പേര്‍സണല്‍ ട്രെയിനര്‍ ഡീനിന്‍റെയും മകളാണ് അലന്ന. മോഡലും സോഷ്യല്‍ മീഡിയ ഇന്‍ഫ്ലുവെന്‍സറുമാണ് അലന്ന. ഫോട്ടോഗ്രാഫറും വീഡിയോ ഗ്രാഫറുമായ ഐവറുമായുള്ള തന്‍റെ ഔദ്യോഗിക വിവാഹ ഫോട്ടോകൾ അലന്ന തന്‍റെ സോഷ്യല്‍ മീഡിയയില്‍ പങ്കുവച്ചു. ഒപ്പം ഒരു അടിക്കുറിപ്പും പോസ്റ്റ്‌ ചെയ്‌തു.
'ഇന്നലെ ഒരു യക്ഷിക്കഥ പോലെയായിരുന്നു, ലോകത്തിലെ മറ്റെന്തിനേക്കാളും ഞാൻ നിന്നെ സ്നേഹിക്കുന്നു. ഐവർ മക്രേ, നിങ്ങളോടൊപ്പം ഒരു കുടുംബം ആരംഭിക്കാൻ ഇനിയും കാത്തിരിക്കാന്‍ ആവില്ല. (നിരവധി ചുവന്ന ഹാര്‍ട്ട് ഇമോജികള്‍ക്കൊപ്പം). -ഇപ്രകാരമായിരുന്നു അലന്നയുടെ കുറിപ്പ്. ഇതിന് മറുപടി പറഞ്ഞ് ഐവറും രംഗത്തെത്തി. 'എന്‍റെ ഭാര്യേ, ഞാൻ നിന്നെ വളരെയധികം സ്നേഹിക്കുന്നു' -എന്ന് ഐവറും അലീനയുടെ കുറിപ്പിന് മറുപടി പറഞ്ഞു.
നടി അനന്യ പാണ്ഡെ, അനുരാഗ് കശ്യപിന്‍റെ മകള്‍ ആലിയ കശ്യപ്‌ എന്നിവര്‍ അലന്നയുടെയും ഐവറിന്‍റെയും വിവാഹ വീഡിയോകളും, ചിത്രങ്ങളും ഇന്‍സ്‌റ്റഗ്രാമില്‍ പങ്കുവച്ചിരുന്നു. നടി ഷിബാനി ദണ്ഡേക്കർ, വിജെ അനുഷ ദണ്ഡേക്കർ, സൽമാൻ ഖാന്‍റെ സഹോദരി അൽവിറ ഖാൻ, ഭർത്താവും ചലച്ചിത്ര സംവിധായകനുമായ അതുൽ അഗ്നിഹോത്രി, സോനാക്ഷി സിൻഹ, ഷാനയ കപൂർ, നീലം കോത്താരി, മഹീപ് കപൂർ തുടങ്ങി നിരവധി പ്രമുഖരും അലന്നയുടെ വിവാഹത്തിൽ പങ്കെടുത്തു.
Also Read:'ടൈഗര്‍ 3'യില്‍ 'പഠാന്‍റെ' എന്‍ട്രിക്കായി 6 മാസം ; ചിത്രീകരണത്തിന് 7 ദിവസം
