ന്യൂഡല്‍ഹി: ഏക സിവിൽ കോഡ് ഭരണഘടന വിരുദ്ധവും ന്യൂനപക്ഷ വിരുദ്ധവുമായ നീക്കമാണെന്ന് അഖിലേന്ത്യ മുസ്‌ലിം വ്യക്തിനിയമ ബോർഡ് (എഐഎംപിഎൽബി). പണപ്പെരുപ്പം, സമ്പദ്‌വ്യവസ്ഥ, വർധിച്ചുവരുന്ന തൊഴിലില്ലായ്‌മ എന്നിവയിൽ നിന്ന് ജനങ്ങളുടെ ശ്രദ്ധ തിരിക്കാനാണ് ഉത്തരാഖണ്ഡും ഉത്തർപ്രദേശും കേന്ദ്ര സർക്കാരും ഏക സിവിൽ കോഡ് നടപ്പിലാക്കുന്നതെന്നും അഖിലേന്ത്യ മുസ്‌ലിം വ്യക്തിനിയമ ബോർഡ് ആരോപിച്ചു.
ഏക സിവിൽ കോഡ് ഏറ്റെടുക്കരുതെന്ന് ബോര്‍ഡ് കേന്ദ്രത്തോട് അഭ്യർഥിച്ചു. രാജ്യത്തെ എല്ലാ പൗരന്മാർക്കും അവരുടെ മതമനുസരിച്ച് ജീവിതം നയിക്കാൻ ഇന്ത്യൻ ഭരണഘടന അനുവദിച്ചിട്ടുണ്ടെന്നും അത് മൗലികാവകാശങ്ങളിൽ ഉൾപ്പെടുത്തിയിട്ടുണ്ടെന്നും എഐഎംപിഎൽബി ജനറൽ സെക്രട്ടറി ഹസ്രത്ത് മൗലാന ഖാലിദ് സൈഫുല്ല റഹ്‌മാനി വാർത്താക്കുറിപ്പിൽ പറഞ്ഞു.
ഈ അവകാശത്തിന് കീഴിൽ, ന്യൂനപക്ഷങ്ങൾക്കും ആദിവാസി വിഭാഗങ്ങൾക്കും അവരുടെ ഇഷ്‌ടങ്ങൾക്കും പാരമ്പര്യങ്ങൾക്കും അനുസൃതമായി വ്യത്യസ്‌ത വ്യക്തിനിയമങ്ങൾ നിലനിർത്തിയിട്ടുണ്ട്, അത് രാജ്യത്തിന് ഒരു ദോഷവും വരുത്തുന്നില്ല. ഭൂരിപക്ഷത്തിനും ന്യൂനപക്ഷത്തിനും ഇടയിൽ പരസ്‌പര ഐക്യവും പരസ്‌പര വിശ്വാസവും നിലനിർത്താൻ ഇത് സഹായിക്കുമെന്നും ബോർഡ് പ്രസ്‌താവനയിൽ അറിയിച്ചു.