ടിആർഎസ് എംഎൽഎമാരെ കൂറുമാറ്റാൻ ശ്രമിച്ച കേസ്; തെലങ്കാനയില്‍ നിന്നുള്ള പ്രത്യേക അന്വേഷണ സംഘം കൊച്ചിയില്‍

കേസില്‍ അറസ്റ്റിലായ രാമചന്ദ്ര ഭാരതിയുടെ സുഹൃത്തായ സ്വാമിയെ തേടിയാണ് തെലങ്കാന പൊലീസ് കൊച്ചിയിലെത്തിയത്. തെലങ്കാനയിൽ ബിജെപിയുടെ ‘ഓപ്പറേഷൻ കമല’യ്ക്കു പിന്നിൽ ബിഡിജെഎസ് അധ്യക്ഷൻ തുഷാർ വെള്ളാപ്പള്ളിയാണെന്ന് തെലങ്കാന മുഖ്യമന്ത്രി കെ ചന്ദ്രശേഖര റാവു ആരോപിച്ചിരുന്നു

എറണാകുളം:തുഷാർ വെള്ളാപ്പള്ളി ആരോപണ വിധേയനായ, ടിആർഎസ് എംഎൽഎമാരെ കൂറുമാറ്റാൻ ശ്രമിച്ച കേസിൽ അന്വേഷണം കൊച്ചിയിലേക്കും. കേസ് അന്വേഷിക്കുന്ന പ്രത്യേക അന്വേഷണ സംഘം കൊച്ചിയിലെത്തി. ഇതേ കേസിൽ അറസ്റ്റിലായ രാമചന്ദ്ര ഭാരതിയുടെ സുഹൃത്തായ സ്വാമിയെ തേടിയാണ് തെലങ്കാന പൊലീസ് എറണാകുളത്ത് എത്തിയത്.

സ്വാമി ഒളിവിലാണെങ്കിലും ഇയാളുമായി ബന്ധമുള്ള രണ്ട് പേരെ കസ്റ്റഡിയിലെടുത്തതായാണ് വിവരം. നൽഗൊണ്ട എസ് പി രമ രാജേശ്വരിയുടെ നേതൃത്വത്തിൽ കഴിഞ്ഞ ദിവസം കൊച്ചിയിൽ തെലങ്കാന പൊലീസ് പരിശോധന നടത്തിയിരുന്നു. കൊച്ചി പൊലീസുമായി സഹകരിച്ചാണ് തെലങ്കാന പൊലീസ് ടിആർഎസ് എംഎൽഎ മാരെ കൂറുമാറ്റാൻ ശ്രമിച്ച കേസിൽ ഇവിടെ അന്വേഷണം നടത്തുക.