ഹൈദരാബാദ് : അമിതാഭ്‌ ബച്ചൻ പ്രധാന കഥാപാത്രമായെത്തുന്ന ഝുണ്ഡ് സിനിമയുടെ റിലീസ് തടയണമെന്നാവശ്യപ്പെട്ട് സമർപ്പിച്ച ഹർജിയിൽ അപ്രീതി പ്രകടമാക്കി തെലങ്കാന ഹൈക്കോടതി. പരാതിക്കാരന് കോടതി പത്ത് ലക്ഷം രൂപ പിഴ വിധിച്ചു. കോടതിയുടെ സമയം നഷ്‌ടപ്പെടുത്തിയെന്ന് ചൂണ്ടിക്കാട്ടിയാണ് നടപടി.
അടിയന്തരമായി ഹർജി പരിഗണിക്കണമെന്നായിരുന്നു ആവശ്യം. 30 ദിവസത്തിനകം പ്രധാനമന്ത്രിയുടെ കൊവിഡ് സഹായ നിധിയിൽ തുക നിക്ഷേപിക്കാനും തുക അടക്കാത്ത സാഹചര്യത്തിൽ ഇയാളിൽ നിന്ന് പണം കണ്ടെത്താനും ഹൈദരാബാദ് ജില്ല കലക്‌ടർക്ക് കോടതി നിർദേശം നൽകി.
എൻജിഒ സ്ലം സോക്കറിന്‍റെ സ്ഥാപകനായ വിജയ് ബർസെയുടെ ജീവിതത്തെ ആസ്‌പദമാക്കി ഒരുക്കുന്ന ചിത്രമാണ് ഝുണ്ഡ്. ഹൈദരാബാദ് സ്വദേശിയായ സംവിധായകൻ ചിന്നികുമാർ ആണ് ഹർജിയുമായി ഹൈക്കോടതിയെ സമീപിച്ചത്.