ന്യൂഡല്‍ഹി :സഹപാഠിയുടെയും കൂട്ടാളികളുടെയും മര്‍ദനത്തിന് ഇരയായ പ്ലസ് ടു വിദ്യാര്‍ഥി മരിച്ചു (Class 12 Student Dies In Delhi). മര്‍ദനത്തില്‍ പരിക്കേറ്റ വിദ്യാര്‍ഥി ചികിത്സയിലിരിക്കെയാണ് മരിച്ചത്. ഡല്‍ഹിയില്‍ ഡിസംബര്‍ 15നാണ് വിദ്യാര്‍ഥിയുടെ മരണത്തിന് ഇടയാക്കിയ സംഭവം നടന്നത് (Student Beaten Up Teen Died In Delhi).
ക്ലാസ് കഴിഞ്ഞ് മടങ്ങവെ, 17കാരന്‍ മറ്റൊരു വിദ്യാര്‍ഥിയുമായി വാക്കേറ്റത്തില്‍ ഏര്‍പ്പെട്ടിരുന്നു. ഇതിന് പിന്നാലെയാണ് കുട്ടിക്ക് മര്‍ദനമേറ്റത്. സ്കൂളിലെ തന്നെ മറ്റൊരു വിദ്യാര്‍ഥിയും സുഹൃത്തുക്കളും ചേര്‍ന്നാണ് 17കാരനെ മര്‍ദനത്തിന് ഇരയാക്കിയത്.
മര്‍ദനത്തില്‍ 17കാരന്‍റെ തലയ്‌ക്കും മുഖത്തിനും പരിക്കേറ്റിരുന്നു. ഇരു കക്ഷികളും ചേര്‍ന്ന് പ്രശ്‌നം സംസാരിച്ച് ഒത്തുതീര്‍പ്പാക്കിയതിനെ തുടര്‍ന്ന് സംഭവത്തില്‍ കേസ് ഒന്നും രജിസ്റ്റര്‍ ചെയ്‌തിരുന്നില്ലെന്ന് പൊലീസ് വ്യക്തമാക്കി. സ്‌കൂളിന് സമീപത്തുള്ള ക്ലിനിക്കില്‍ പോയി പ്രാഥമിക ചികിത്സ തേടിയ ശേഷമായിരുന്നു മര്‍ദനത്തിന് ഇരയായ വിദ്യാര്‍ഥി തിരികെ വീട്ടിലേക്ക് പോയത്.
സംഭവത്തെ കുറിച്ച് പൊലീസ് പറയുന്നത് ഇങ്ങനെ :വിശദമായ അന്വേഷണത്തില്‍ ഇരു വിദ്യാര്‍ഥികളും തമ്മില്‍ ഡിസംബര്‍ 12ന് സ്കൂള്‍ കഴിഞ്ഞ ശേഷം വാക്കേറ്റം ഉണ്ടായതായി കണ്ടെത്താന്‍ കഴിഞ്ഞു. തുടര്‍ന്ന് ഡിസംബര്‍ 15ന് ഭജൻപുരയിലെ ഡി ബ്ലോക്ക് ഏരിയയിൽ വച്ച് ഇരയായ 17കാരനെ പ്രതിയായ വിദ്യാര്‍ഥികളും കൂട്ടാളികളും ചേര്‍ന്ന് മര്‍ദിച്ചു. മുഖത്തിനും തലയ്‌ക്കും പരിക്കേറ്റ വിദ്യാര്‍ഥി പ്രാഥമിക ചികിത്സ തേടിയ ശേഷം വീട്ടിലേക്ക് പോയി.