ടൂംഗര്‍പുര്‍ (രാജസ്ഥാന്‍): രാജസ്ഥാനില്‍ മതപരമായ ചടങ്ങിനിടെ പതിനഞ്ചുകാരി ബന്ധുവായ ഒമ്പത് വയസുകാരിയെ കഴുത്തറത്ത് കൊന്നു. രാജസ്ഥാനിലെ ടൂംഗര്‍പുരില്‍ തിങ്കളാഴ്‌ച പുലര്‍ച്ചെ മൂന്ന് മണിക്കാണ് സംഭവം. കഴിഞ്ഞ രണ്ട് ദിവസമായി പെണ്‍കുട്ടിയുടെ പെരുമാറ്റത്തില്‍ അസ്വാഭാവികതയുണ്ടെന്നാണ് കുടുംബം പൊലീസിന് നല്‍കിയ മൊഴി.
സംഭവ ദിവസം വീടിനുള്ളില്‍ പൂജ നടക്കുന്നതിനിടെ പെണ്‍കുട്ടി മുറിയില്‍ സൂക്ഷിച്ചിരുന്ന വാളെടുക്കുകയും തുടര്‍ന്ന് അക്രമാസക്തയാകുകയുമായിരുന്നുവെന്ന് ചിത്തരി പൊലീസ് സ്റ്റേഷനിലെ എസ്എച്ച്ഒ ഗോവിന്ദ് സിങ് പറഞ്ഞു. പെണ്‍കുട്ടിയുടെ പെരുമാറ്റത്തില്‍ ഭയപ്പെട്ട മാതാപിതാക്കള്‍ വീടിനുള്ളില്‍ നിന്ന് ഓടി പുറത്തിറങ്ങി. ഇതിന് പിന്നാലെ പെണ്‍കുട്ടി വാള്‍ ഉപയോഗിച്ച് തൊട്ടടുത്ത മുറിയില്‍ കിടന്നുറങ്ങുകയായിരുന്ന ഒമ്പത് വയസുകാരിയുടെ കഴുത്തറുക്കുകയായിരുന്നു.