മരുമകളെ പീഡിപ്പിക്കുന്ന അമ്മായിമ്മ അറിയാൻ, കാത്തിരിക്കുന്നത് കടുത്ത ശിക്ഷ

അമ്മായിയമ്മ മരുമകളോട് കൂടുതൽ മൃദു സമീപനം സ്വീകരിച്ചില്ലെങ്കില്‍ അത് കുറ്റകൃത്യമെന്ന് സുപ്രീംകോടതി

ന്യൂഡൽഹി: ഒരു സ്ത്രീ തന്‍റെ മരുമകളോട് ക്രൂരത കാണിക്കുന്നത് ഗുരുതരമായ കുറ്റകൃത്യമാണെന്ന് സുപ്രീം കോടതി. അമ്മായിയമ്മയുടെ സ്ത്രീധന പീഡനത്തെ തുടർന്ന് മരുമകൾ ആത്മഹത്യ ചെയ്‌ത സംഭവത്തിൽ മദ്രാസ് ഹൈക്കോടതി അമ്മായിയമ്മക്ക് വിധിച്ച ശിക്ഷ ശരിവച്ചുകൊണ്ടായിരുന്നു സുപ്രീം കോടതിയുടെ നിരീക്ഷണം. ഒരു സ്ത്രീ മറ്റൊരു സ്ത്രീയെ, മരുമകളെ, സംരക്ഷിച്ചില്ലെങ്കിൽ അവർ കൂടുതൽ അപകടത്തിലാകുമെന്നും കോടതി പറഞ്ഞു.

ആത്മഹത്യ ചെയ്‌ത സ്ത്രീയെ ഭർത്താവും അമ്മയും സഹോദരിയും അച്ഛനും ചേർന്ന് പീഡിപ്പിക്കുന്നുവെന്ന് മരിച്ച സ്ത്രീയുടെ അമ്മ പരാതി നൽകിയിരുന്നു. ഭർതൃ വീട്ടുകാരുടെ പീഡനത്തെ തുടർന്നാണ് മകൾ ആത്മഹത്യ ചെയ്‌തതെന്നും പരാതിയിൽ പറയുന്നു. തെളിവുകളുടെ അടിസ്ഥാനത്തിൽ നാലാം പ്രതിയെ വെറുതെ വിട്ട വിചാരണ കോടതി മറ്റ് മൂന്ന് പ്രതികളെയും ഐപിസി സെക്ഷൻ 498എ, 306 വകുപ്പുകൾ പ്രകാരം ശിക്ഷിച്ചു.

തുടർന്ന് പ്രതികൾ ഹൈക്കോടതിയിൽ അപ്പീൽ നൽകി. അപ്പീൽ ഹൈക്കോടതി ഭാഗികമായി അംഗീകരിക്കുകയും സെക്ഷൻ 306 പ്രകാരമുള്ള കുറ്റത്തിൽ എല്ലാ പ്രതികളെയും വെറുതെ വിടുകയും സെക്ഷൻ 498 എ പ്രകാരമുള്ള കുറ്റത്തിന് ഒന്നും മൂന്നും നമ്പർ പ്രതികളുടെ ശിക്ഷ മാറ്റിവയ്ക്കുകയും രണ്ടാം നമ്പർ പ്രതിയായ അമ്മായിയമ്മയുടെ ശിക്ഷ നിലനിർത്തുകയും ചെയ്‌തു.

തുടർന്ന് പ്രതി സുപ്രീം കോടതിയെ സമീപിക്കുകയായിരുന്നു. എന്നാൽ മരണപ്പെട്ട സ്ത്രീ സ്ത്രീധനത്തിന്‍റെ പേരിൽ അമ്മായിയമ്മയുടെ പീഡനത്തിനും ക്രൂരതയ്ക്കും ഇരയായെന്ന് തെളിഞ്ഞുവെന്ന് സുപ്രീംകോടതി പറഞ്ഞു. ഒരു സ്ത്രീ എന്ന നിലയിൽ അമ്മായിയമ്മ മരുമകളുടെ കാര്യത്തിൽ കൂടുതൽ മൃദു സമീപനം സ്വീകരിക്കണമായിരുന്നുവെന്ന് കേസ് പരിഗണിച്ച ബെഞ്ച് വ്യക്തമാക്കി.

ഇരയായ യുവതിയുടെ ഭർത്താവ് വിദേശത്താണ്. യുവതി ഭർതൃ വീട്ടുകാർക്കൊപ്പം തനിച്ച് താമസിക്കുന്ന സാഹചര്യത്തിൽ സ്ത്രീധനത്തിന്‍റെയോ മറ്റ് എന്തിന്‍റെയെങ്കിലുമോ പേരിൽ പീഡിപ്പിക്കുന്നതിന് പകരം പരിപാലിക്കേണ്ടത് അമ്മായിയമ്മയുടെ കടമയായിരുന്നുവെന്ന് കോടതി നിരീക്ഷിച്ചു. കേസിൽ അമ്മായിയമ്മയോട് ഒരു തരത്തിലുമുള്ള ദയയും കാണിക്കേണ്ട ആവശ്യമില്ലെന്നും പ്രതിക്ക് എന്തെങ്കിലും ശിക്ഷ നൽകേണ്ടത് അത്യാവശ്യമാണെന്നും കോടതി പറഞ്ഞു.

എന്നിരുന്നാലും സംഭവം നടന്നത് 2006ൽ ആണെന്നതും നിലവിൽ പ്രതിക്ക് 80 വയസ് പ്രായമുണ്ടെന്നതും കണക്കിലെടുത്ത് ഒരു വർഷം തടവുശിക്ഷ എന്നത് മൂന്ന് മാസമായി കുറക്കാനും വിചാരണ കോടതി ചുമത്തിയ പിഴ അടക്കാനും സുപ്രീം കോടതി ഉത്തരവിട്ടു.