'ഇന്ദിരാഗാന്ധിയെ അനുസ്‌മരിക്കാതെ പഞ്ചാബ് കോൺഗ്രസ് നേതൃത്വം' ; വിമർശനവുമായി മുൻ പ്രസിഡന്‍റ്

ചരമ വാർഷക ദിനത്തിൽ ഇന്ദിരാഗാന്ധിയെ അനുസ്‌മരിക്കാതെ നേതൃത്വം വീഴ്‌ച വരുത്തിയെന്ന് പഞ്ചാബ് കോണ്‍ഗ്രസ് മുന്‍ പ്രസിഡന്‍റ്

അമൃത്‌സർ: പഞ്ചാബ് കോൺഗ്രസ് വീണ്ടും കലുഷിതമാകുന്നു. ചരമ വാർഷിക ദിനത്തിൽ ഇന്ദിരാഗാന്ധിയെ അനുസ്‌മരിക്കാൻ മറന്നുപോയെന്ന് ആരോപിച്ച് മുഖ്യമന്ത്രി ചരണ്‍ജിത്ത് സിങ് ചന്നിക്കെതിരെയും പഞ്ചാബ് കോൺഗ്രസ് പ്രസിഡന്‍റ് നവജ്യോത് സിങ് സിദ്ദുവിനെതിരെയും വിമർശനവുമായി മുതിർന്ന നേതാവും പാര്‍ട്ടി മുൻ പ്രസിഡന്‍റുമായ സുനിൽ ജാഖർ രംഗത്തെത്തി.

ഇന്ത്യൻ ചരിത്രത്തിൽ നിന്ന് ഇന്ദിരാഗാന്ധിയെ തുടച്ചുനീക്കാൻ ശ്രമിക്കുകയാണ് ബിജെപി. പഞ്ചാബിൽ കോൺഗ്രസിന് നേതൃത്വമില്ലേ?. കഴിഞ്ഞ വർഷം സർക്കാരിന്‍റെ ഭാഗത്തുനിന്ന് പരസ്യം നൽകിയിരുന്നുവെന്നും എന്നാൽ ഈ വർഷം അത് കണ്ടില്ലെന്നും സുനിൽ ജാഖർ ട്വീറ്റ് ചെയ്‌തു.

സുനിൽ ജാഖറിന്‍റെ വിമർശനത്തിന് ശേഷമാണ് പഞ്ചാബ് കോൺഗ്രസ് നേതൃത്വം ഇന്ദിര അനുസ്‌മരണ ട്വീറ്റിട്ടത്.