ന്യൂഡല്‍ഹി: ഡൽഹി മുഖ്യമന്ത്രിയും ആം ആദ്‌മി പാർട്ടി ദേശീയ കൺവീനറുമായ അരവിന്ദ് കെജ്‌രിവാളിനെതിരെ ഗുരുതര ആരോപണവുമായി തട്ടിപ്പ് കേസില്‍ ജയിലിൽ കഴിയുന്ന സുകേഷ് ചന്ദ്രശേഖര്‍. സുകേഷ് എഴുതിയ കത്തിലാണ് കെജ്‌രിവാളിനെ വിമര്‍ശിച്ചിരിക്കുന്നത്. തന്‍റെ പക്കല്‍ നിന്ന് 50 കോടി രൂപ സ്വീകരിച്ച് രാജ്യസഭ സീറ്റ് വാഗ്‌ദാനം ചെയ്‌തു എന്നാണ് സുകേഷ് കത്തില്‍ പറയുന്നത്.
'ഞാന്‍ രാജ്യത്തെ ഏറ്റവും വലിയ കൊള്ളക്കാരനാണെങ്കില്‍ എന്ത് അടിസ്ഥാനത്തിലാണ് തന്നോട് 50 കോടി വാങ്ങിയത്', കത്തില്‍ സുകേഷ് ചോദിച്ചു. കെജ്‌രിവാളിനും എഎപി നേതാക്കളായ കൈലാഷ് ഗെലോട്ട്, സത്യേന്ദ്ര ജെയിൻ എന്നിവര്‍ക്കെതിരെ ഡല്‍ഹി ഗവര്‍ണര്‍ക്ക് സുകേഷ് പരാതി നല്‍കിയതായും കത്തില്‍ പറയുന്നു.
'2016ല്‍ കർണാടകയിലെയും തമിഴ്‌നാട്ടിലെയും ആം ആദ്‌മി പാർട്ടി സീറ്റുകള്‍ക്ക് പകരമായി 500 കോടി രൂപ സംഭാവന നല്‍കാന്‍ 20 മുതല്‍ 30 വരെ വ്യക്തികളെ കൊണ്ടുവരാന്‍ നിങ്ങള്‍ എന്തിനാണ് എന്നെ നിര്‍ബന്ധിച്ചത്', സുകേഷ് കത്തില്‍ ചോദിക്കുന്നു. ജയിലില്‍ കഴിഞ്ഞിരുന്ന എഎപി നേതാവ് സത്യേന്ദ്ര ജെയിനോടൊപ്പം കെജ്‌രിവാള്‍ 2016ല്‍ ഒരു പഞ്ചനക്ഷത്ര ഹോട്ടലില്‍ സുകേഷ് ഒരുക്കിയ അത്താഴ വിരുന്നില്‍ പങ്കെടുത്തതായും കത്തില്‍ ആരോപണമുണ്ട്.