ട്വിറ്ററിലൂടെ ആത്മഹത്യാ സൂചന ; മലയാളി യുവാവിനെ രക്ഷപ്പെടുത്തി മുംബൈ പൊലീസ്

ആത്മഹത്യാശ്രമ സൂചന നൽകിക്കൊണ്ടുള്ള ട്വീറ്റുകൾ ശ്രദ്ധയിൽപെട്ട മാധ്യമ പ്രവർത്തകനാണ് സൈബർ പൊലീസിനെ വിവരം അറിയിച്ചത്.

മുംബൈ : ആത്മഹത്യയ്ക്ക് തയ്യാറെടുക്കുകയാണെന്ന് ട്വിറ്ററിലൂടെ സൂചന നല്‍കിയ മലയാളി യുവാവിനെ രക്ഷപ്പെടുത്തി മുംബൈ സൈബർ പൊലീസ്. ദാദറിലെ ഒരു ഹോട്ടലിലെത്തിയാണ് 30കാരനായ ഡിപ്ലോമ വിദ്യാര്‍ഥിയെ സൈബർ സംഘമെത്തി രക്ഷപ്പെടുത്തിയത്.

കാമുകി വിവാഹത്തിന് സമ്മതിക്കാത്തതിനെ തുടർന്നാണ് യുവാവ് ആത്മഹത്യക്ക് തയ്യാറെടുത്തതെന്നും കൗൺസിലിങ്ങിനായി ആശുപത്രിയിലേക്ക് മാറ്റിയെന്നും ഉദ്യോഗസ്ഥർ അറിയിച്ചു.

യുവാവിന്‍റെ ട്വീറ്റുകൾ ഒരു മാധ്യമ പ്രവർത്തകനാണ് വാട്ട്സ് ആപ്പ് വഴി സൈബർ പൊലീസിന് കൈമാറിയത്. വിവരം ലഭിച്ചയുടനെ പൊലീസ് ഇയാൾക്കായുള്ള തെരച്ചിൽ ആരംഭിച്ചു.

ഇൻസ്‌പെക്‌ടർ സജ്ജയ്‌ ഗോവിൽക്കറിന്‍റെ നേതൃത്വത്തിലുള്ള സംഘം ഹോട്ടലിലെത്തി യുവാവിനെ രക്ഷിക്കുകയായിരുന്നുവെന്നും മുംബൈ പൊലീസ് അറിയിച്ചു.