രാജ്യത്ത് സ്റ്റാർട്ട് അപ്പ് സംസ്‌കാരം ഊര്‍ജസ്വലമായെന്ന് പ്രധാനമന്ത്രി നരേന്ദ്രമോദി

ഇന്ത്യന്‍ ടീമിന്‍റെ ഒളിമ്പിക്‌സ് നേട്ടത്തില്‍ മേജര്‍ ധ്യാൻചന്ദിന്‍റെ ആത്മാവ് ഏറെ സന്തോഷിക്കുന്നുണ്ടാവുമെന്ന് നരേന്ദ്രമോദി

ന്യൂഡൽഹി :രാജ്യത്ത് സ്റ്റാർട്ട് അപ്പ് സംസ്കാരം വളരെ ഊര്‍ജസ്വലമായി മാറിയെന്ന് പ്രധാനമന്ത്രി നരേന്ദ്ര മോദി. താരതമ്യേന ചെറിയ നഗരങ്ങളിൽ പോലും യുവാക്കള്‍ സംരഭകരായി മാറുന്നു.

ഇത് ഇന്ത്യയുടെ ശോഭനമായ ഭാവിയുടെ അടയാളമാണെന്ന് ഉറപ്പിച്ചുപറയാന്‍ കഴിയുമെന്നും മോദി പറഞ്ഞു. പ്രതിമാസ റേഡിയോ പ്രക്ഷേപണ പരിപാടിയായ മൻ കി ബാത്തില്‍ സംസാരിക്കുകയായിരുന്നു അദ്ദേഹം.

രാജ്യത്തെ ബഹിരാകാശ മേഖലയിലെ പരിഷ്‌കാരങ്ങൾ ജനങ്ങളെ വലിയ തോതില്‍ ആകര്‍ഷിച്ചിട്ടുണ്ട്. വരും കാലങ്ങളില്‍ രാജ്യത്തെ സർവകലാശാലകളില്‍ നിന്നും ധാരാളം ഉപഗ്രഹങ്ങള്‍ രൂപംകൊള്ളും.

'ധ്യാൻചന്ദിന്‍റെ ആത്മാവ് സന്തോഷിക്കുന്നുണ്ടാവും'

ഓഗസ്റ്റ് 29 ഞായറാഴ്‌ച മേജര്‍ ധ്യാൻചന്ദിന്‍റെ ജന്മദിനത്തില്‍ രാജ്യം അദ്ദേഹത്തെ അനുസ്‌മരിക്കുകയാണ്. അദ്ദേഹത്തോടുള്ള ആദരസൂചകമായി രാജ്യം ഈ ദിവസം ദേശീയ കായിക ദിനമായി ആചരിക്കുന്നു.

മേജര്‍ ധ്യാൻചന്ദിന്‍റെ ആത്മാവ് ഏറെ സന്തോഷിക്കുന്നുണ്ടാവും. കാരണം, നാല് പതിറ്റാണ്ടിനുശേഷം ഹോക്കിയിൽ വിജയഗാഥ രചിച്ചിരിയ്ക്കുകയാണ് ഇന്ത്യന്‍ താരങ്ങള്‍.

യുവാക്കൾ കായികരംഗത്തേക്ക് വലിയ തോതില്‍ ആകർഷിക്കപ്പെടുന്നു. മാതാപിതാക്കൾ അവരെ പിന്തുണയ്ക്കുന്നതിൽ സന്തോഷമുണ്ടെന്നും പ്രധാനമന്ത്രി പറഞ്ഞു.