മോസ്കോ: 50 വർഷം മുമ്പ് സോവിയറ്റ് യൂണിയൻ ശുക്രനിലേക്ക് വിക്ഷേപിച്ച പേടകം ഭൂമിയിലേക്ക് പതിക്കാനൊരുങ്ങുന്നു. കോസ്മോസ് 482 എന്ന് പേരിട്ടിരിക്കുന്ന പേടകം മൂന്നോ നാലോ വർഷങ്ങൾക്കുള്ളിൽ ഭൂമിയിലേക്ക് പതിക്കുമെന്നാണ് ശാസ്ത്രജ്ഞരുടെ കണ്ടെത്തൽ. വിഷേപണത്തിന് പിന്നാലെ ഒരു എഞ്ചിൻ തകരാറിലായതിനാൽ ലക്ഷ്യ സ്ഥാനത്തേക്ക് എത്താതെ ഇത്രയും നാൾ ഭൂമിയുടെ ഭ്രമണപഥത്തിൽ ചുറ്റിക്കൊണ്ടിരിക്കുകയായിരുന്നു പേടകം.
1972 മാർച്ച് 27ന് ശുക്രനിലേക്ക് വെനീറ 8 എന്ന പേടകത്തെ സോവിയറ്റ് യൂണിയൻ വിക്ഷേപിച്ചിരുന്നു. ഇതിന് പിന്നാലെ മാർച്ച് 31നാണ് കോസ്മോസ് 482 എന്ന പേടകത്തെ വിക്ഷേപിച്ചത്. 117 ദിവസത്തെ യാത്രയ്ക്ക് ശേഷം വെനീറ-8 വിജയകരമായി ശുക്രനിൽ ഇറങ്ങി ഭൂമിയിലേക്ക് വിവരങ്ങൾ അയച്ചു തുടങ്ങി. എന്നാൽ കോസ്മോസ് 482 ഭൂമിയുടെ ഭ്രമണപഥത്തിലൂടെ കടന്നുപോകുന്നതിൽ പരാജയപ്പെടുകയായിരുന്നു. ഭൂമിയെ ചുറ്റുന്ന അവസാന പാതയിലാണ് ദൗത്യം പരാജയപ്പെട്ടത്.
ടൈമർ ചതിച്ചു:ഒരു മോൾനിയ ബൂസ്റ്റർ ഉപയോഗിച്ചാണ് കോസ്മോസ് 482 വിക്ഷേപിച്ചത്. വെനീറ 8 എന്ന പേടകത്തിന്‍റെ അതേ രൂപകൽപ്പന തന്നെയായിരുന്നു കോസ്‌മോസിന്‍റേതും. എന്നാൽ തെറ്റായി സജ്ജീകരിച്ച ടൈമർ കാരണം ഭൂമിയെ ചുറ്റുന്നതിന്‍റെ അവസാന പാതയിൽ പേടകത്തിന്‍റെ ബൂസ്റ്റർ ഷട്ട്ഡൗണായി. ഇതോടെ പേടകത്തെ ഭൂമിയുടെ ഭ്രമണപഥത്തിൽ നിന്ന് പുറത്തേക്ക് നയിക്കാനായില്ല. ഇതാണ് ദൗത്യത്തിന്‍റെ പരാജയത്തിന് കാരണമായത്. എഞ്ചിൻ തകരാറിലായ സമയത്ത് പേടകം രണ്ട് ഭാഗങ്ങളായി വേർപിരിഞ്ഞിരുന്നു.
ഭൂമിയുടെ അടുത്ത്:1972- മുതല്‍ ഭൂമിയെ കറങ്ങുന്ന ഡിസന്‍റ് ക്രാഫ്റ്റിന്‍റെ ഭൂമിയുമായുള്ള അകലം കഴിഞ്ഞ അമ്പത് വർഷത്തിനിടെ 7,700 കിലോമീറ്ററിലധികം കുറഞ്ഞുവെന്നാണ് ശാസ്ത്രജ്ഞർ ചൂണ്ടിക്കാട്ടുന്നത്. 2022 മെയ് 1 ലെ കണക്ക് പ്രകാരം ഈ വസ്തു ഭൂമിയെ ചുറ്റുന്നത് 198 x 1957 കിലോമീറ്റർ ഭ്രമണപഥത്തിലാണെന്നും ശാസ്ത്രജ്ഞൻ വ്യക്‌തമാക്കുന്നു.
എപ്പോൾ തകരും:2024-നും 2027-നും ഇടയിൽ കോസ്മോസ് 482-ന് ഭൂമിയുടെ അന്തരീക്ഷത്തിലേക്ക് വീണ്ടും പ്രവേശിക്കാൻ കഴിയുമെന്നാണ് ബഹിരാകാശ സാഹചര്യ ബോധവത്കരണ കൺസൾട്ടന്‍റായ മാക്രോ ലാങ്‌ബ്രോക്കിന്‍റെ റിപ്പോർട്ട്. എന്നാൽ 2023നും 2025നും ഇടയിലുള്ള സമയത്ത് പേടകം ഭൂമിയിലേക്ക് പതിച്ചേക്കാം എന്നാണ് ബഹിരാകാശ ശാസ്ത്രജ്ഞനും കോസ്‌മോനോട്ടിക്‌സ് ചരിത്രകാരനുമായ പവൽ ഷുബിൻ പറയുന്നത്.