പട്‌ന: ബിഹാറിൽ ചേരിയിലുണ്ടായ തീപിടിത്തത്തിൽ സഹോദരികളായ നാല് പെൺകുട്ടികൾ പൊള്ളലേറ്റ് മരിച്ചു. മുസാഫർപൂർ ജില്ലയിലെ രാംദയാലു മേഖലയിലെ സഹോദരങ്ങളായ മൂന്ന് പേരുടെ വീടുകളിലാണ് ഇന്ന് (02.05.23) പുലർച്ചെ 1:30 ന് തീപിടിച്ചത്. അപകടമുണ്ടായ സമയത്ത് വീട്ടിൽ ഉറങ്ങിക്കിടന്ന പെൺകുട്ടികളാണ് മരണപ്പെട്ടത്.
അഗ്‌നിബാധയിൽ ഏഴ് പേർക്ക് പരിക്കേറ്റിട്ടുണ്ട്. എല്ലാവരും ശ്രീകൃഷ്‌ണ മെഡിക്കൽ കോളേജ് ആശുപത്രിയിൽ ചികിത്സയിലാണ്. മുസാഫർപൂർ സ്വദേശി നരേഷ് റാമിന്‍റെ മക്കളായ സോണി (12), ശിവാനി (8), അമൃത (5), റീത്ത (3) എന്നിവരാണ് മരണപ്പെട്ടത്. അതേസമയം നരേഷ് റാമിന്‍റെ സഹോദരന്മാരും അയൽവാസികളുമായ രാജേഷ് റാം, മുകേഷ് റാം എന്നിവരുടെ വീടുകളിലേയ്‌ക്കും തീ പടർന്നിരുന്നു.