ശ്രദ്ധ വാക്കർ മോഡലിൽ കൊലപാതകം: സ്‌ത്രീയുടെ മൃതദേഹം കഷ്‌ണങ്ങളാക്കി പ്ലാസ്‌റ്റിക് കവറില്‍ കെട്ടി ഡ്രമ്മിൽ സൂക്ഷിച്ച നിലയിൽ

വീട്ടിലെ വാടക താമസക്കാരനും സംഭവത്തിൽ മുഖ്യപ്രതിയെന്നും സംശയിക്കുന്ന പാർവതിപുരം മാന്യം സ്വദേശി റുഷി (40)യെ പൊലീസ് കസ്റ്റഡിയിലെടുത്തു.

വിശാഖപട്ടണം: ആന്ധ്രാ പ്രദേശിലെ മധുരവാഡയിൽ ശ്രദ്ധ വാക്കർ മോഡലിൽ മറ്റൊരു കൊലപാതകം. വാടകവീട്ടിൽ സ്‌ത്രീയുടെ മൃതദേഹം കഷ്‌ണങ്ങളാക്കി പ്ലാസ്‌റ്റിക് കവറിൽ കെട്ടി പ്ലാസ്‌റ്റിക് ഡ്രമ്മിൽ സൂക്ഷിച്ച നിലയിൽ കണ്ടെത്തി. വീട്ടിലെ വാടക താമസക്കാരനും സംഭവത്തിൽ മുഖ്യപ്രതിയെന്നും സംശയിക്കുന്ന പാർവതിപുരം മാന്യം സ്വദേശി റുഷി (40)യെ പൊലീസ് കസ്റ്റഡിയിലെടുത്തു.

2019 ലാണ് റുഷി വാടകയ്‌ക്ക് മധുരവാഡയിൽ വീടെടുത്തത്. സാമ്പത്തിക ബുദ്ധിമുട്ടുകൾ കാരണം റുഷി വീട്ടുടമസ്ഥനായ രമേശിന്‍റെ സ്ഥലത്ത് വെൽഡിങ് അസിസ്റ്റന്‍റായി ജോലി ചെയ്‌തുവരികയായിരുന്നു. കുറേ കാലമായി ഇയാൾ വാടക നൽകാത്തതിനെ തുടർന്ന് പുതിയ താമസക്കാർക്ക് നൽകാൻ രമേശ് ഞായറാഴ്‌ച വാടക വീട്ടിലെത്തിയപ്പോഴാണ് കൊലപാതകം പുറത്തറിഞ്ഞത്.

വീട്ടുടമസ്ഥൻ എത്തിയില്ലെങ്കിൽ മൃതദേഹം പൂർണമായും അഴുകിയശേഷം പ്ലാസ്റ്റിക് കവറുകൾ കുഴിച്ചിടാൻ പ്രതികൾ പദ്ധതിയിട്ടതാകാമെന്നാണ് പൊലീസ് കരുതുന്നത്. വീട്ടിൽ കണ്ടെത്തിയ മൃതദേഹം ആരുടേതാണെന്ന് പൊലീസ് വെളിപ്പെടുത്തിയിട്ടില്ല. മൃതദേഹം പൂർണമായും ദ്രവിച്ച് തലയോട്ടി മാത്രം അവശേഷിച്ച നിലയിലാണ് കണ്ടെത്തിയത്.

ജീർണിച്ച ശരീരഭാഗങ്ങൾ പ്ലാസ്റ്റിക് കവറുകളിൽ പൊതിഞ്ഞ് പോസ്റ്റ്‌മോർട്ടത്തിനായി കെജിഎച്ച് ആശുപത്രിയിലേക്ക് അയച്ചു. റുഷിയും കൊല്ലപ്പെട്ട സ്‌ത്രീയും തമ്മിൽ സാമ്പത്തിക ഇടപാടുകളിൽ എന്തെങ്കിലും വ്യത്യാസമുണ്ടോയെന്നും പൊലീസ് അന്വേഷിക്കുന്നുണ്ട്.