ഖാര്‍ഗെയ്ക്കായി നേതാക്കള്‍ നടത്തിയ പരസ്യയോഗം നിഷ്‌പക്ഷതയ്ക്ക് വിരുദ്ധം ; അതൃപ്‌തി അറിയിച്ച് ശശി തരൂര്‍

ഒക്ടോബർ 17 ന് നടക്കുന്ന കോണ്‍ഗ്രസ് ദേശീയ പ്രസിഡന്‍റ് തെരഞ്ഞെടുപ്പില്‍ ശശി തരൂരിന്‍റെ എതിരാളിയാണ് മല്ലികാര്‍ജുന്‍ ഖാര്‍ഗെ. അദ്ദേഹത്തെ പിന്തുണച്ച് നേതാക്കള്‍ പരസ്യമായി സംഘടിപ്പിച്ച യോഗം തെരഞ്ഞെടുപ്പിന്‍റെ നിഷ്‌പക്ഷതയ്ക്ക് കോട്ടം വരുത്തുന്നുവെന്ന് തരൂര്‍ വിമര്‍ശിച്ചു

ന്യൂഡല്‍ഹി : മല്ലികാര്‍ജുന്‍ ഖാര്‍ഗെയെ പിന്തുണച്ച് ചില നേതാക്കള്‍ പരസ്യമായി രംഗത്തുവന്നതും യോഗം വിളിച്ചുചേര്‍ത്തതും കോണ്‍ഗ്രസ് അധ്യക്ഷ തെരഞ്ഞെടുപ്പിന്‍റെ നിഷ്‌പക്ഷതയ്ക്ക് മങ്ങല്‍ ഏല്‍പ്പിക്കുന്നുവെന്ന് മത്സരാര്‍ഥി ശശി തരൂര്‍. പാര്‍ട്ടിയില്‍ സമൂലമായ മാറ്റം കൊണ്ടുവരാന്‍ ആഗ്രഹിക്കുന്നതായി, ഡൽഹി പ്രദേശ് കോൺഗ്രസ് കമ്മിറ്റി (ഡിപിസിസി) പ്രതിനിധികളോട് വോട്ട് അഭ്യർഥിച്ചുകൊണ്ട് തരൂർ വ്യക്തമാക്കി.

2014-ലെയും 2019-ലെയും ലോക്‌സഭ തെരഞ്ഞെടുപ്പുകളിൽ കോൺഗ്രസിനെ പിന്തുണയ്ക്കാത്ത വോട്ടർമാരെ തിരികെ കൊണ്ടുവരികയാണ് ലക്ഷ്യം.ലഭിച്ച ഡെലിഗേറ്റുകളുടെ പട്ടികയിൽ വിശദാംശങ്ങള്‍ അപൂര്‍ണമായിരുന്നു. ചില ലിസ്റ്റുകളിൽ പേരുകളുണ്ട്, പക്ഷേ കോൺടാക്റ്റ് നമ്പറുകളില്ല, ചിലതില്‍ പേരുകളുണ്ട്, പക്ഷേ ശരിയായ വിലാസമില്ല. അതിനാൽ അവരെ ബന്ധപ്പെടാൻ ബുദ്ധിമുട്ടുന്നുണ്ട്. സംസ്ഥാനങ്ങളിലെ സന്ദര്‍ശന വേളയിലുള്ള കൂടിക്കാഴ്‌ചയ്ക്ക് പല നേതാക്കളെയും ലഭ്യമായില്ലെന്നും തരൂർ പറഞ്ഞു.

എന്നാല്‍ അപൂർണമായ ലിസ്റ്റുകളുടെ പേരിൽ താൻ ആരെയും കുറ്റപ്പെടുത്തുന്നില്ല. 22 വർഷത്തിനിടെ ഇത്തരമൊരു തെരഞ്ഞെടുപ്പ് നടന്നിട്ടില്ലാത്തതിനാൽ പാർട്ടിയുടെ സംവിധാനത്തിൽ പിഴവുകൾ ഉണ്ട്. തെരഞ്ഞെടുപ്പ് സ്വതന്ത്രവും നീതിയുക്തവുമായ രീതിയിൽ നടക്കുമെന്നും ഖാർഗെയുമായി ശത്രുതയില്ലെന്നും അദ്ദേഹം പറഞ്ഞു. പാർട്ടിയെ ശക്തിപ്പെടുത്താൻ രണ്ട് കോൺഗ്രസ് അംഗങ്ങൾ ശ്രദ്ധ കേന്ദ്രീകരിക്കുന്നതാണ് ഈ തെരഞ്ഞെടുപ്പിന്‍റെ സവിശേഷതയെന്നും അദ്ദേഹം കൂട്ടിച്ചേര്‍ത്തു.

ഗാന്ധി കുടുംബവുമായുള്ള അടുപ്പം കാരണമാണ് ഖാർഗെയെ പാർട്ടി അധ്യക്ഷനാക്കണമെന്ന് ചിലര്‍ നിര്‍ബന്ധം പിടിക്കുന്നത്. എന്നാൽ തങ്ങൾ നിഷ്‌പക്ഷത പാലിക്കുമെന്ന് ഗാന്ധി കുടുംബം വ്യക്തമാക്കിയിട്ടുണ്ടെന്ന് തരൂർ ആവർത്തിച്ചു. കോൺഗ്രസ് പ്രസിഡന്‍റ് തെരഞ്ഞെടുപ്പ് ഒക്ടോബർ 17 ന് നടക്കും. ഫലം ഒക്ടോബർ 19 നാണ് പുറത്തുവരിക.