ബോളിവുഡ് കിങ് ഖാന് ഷാരൂഖ് ഖാന്‍റെ 58-ാമത് ജന്മദിനമാണ് ഇന്ന് (King Khan Birthday). താരത്തിന്‍റെ ഈ ജന്മദിനം ആഘോഷിക്കുകയാണ് ലോകമൊട്ടാകെയുള്ള ആരാധകര്‍ (Shah Rukh Khan Birthday Celebration). പ്രശസ്‌ത ഡിജിറ്റല്‍ പ്ലാറ്റ്‌ഫോമായ നെറ്റ്‌ഫ്ലിക്‌സും ഷാരൂഖിന് പിറന്നാള്‍ സമ്മാനവുമായി എത്തിയിരിക്കുകയാണ് (Netflix Birthday gift to Shah Rukh Khan).
ഷാരൂഖിന്‍റെ ഏറ്റവും പുതിയ റിലീസായ ജവാന്‍ (Jawan) നെറ്റ്‌ഫ്ലിക്‌സില്‍ സ്‌ട്രീമിങ് ആരംഭിച്ചിരിക്കുകയാണ് (Jawan on Netflix). ജവാന്‍റെ എക്‌സ്‌റ്റെന്‍ഡഡ് കട്ട് വേര്‍ഷനാണ് നെറ്റ്‌ഫ്ലിക്‌സിലൂടെ കാണാനാവുക (Jawan extended cut version on Netflix). സെപ്‌റ്റംബര്‍ 7ന് തിയേറ്ററുകളില്‍ എത്തിയ ചിത്രം 50 ദിവസങ്ങള്‍ക്ക് ശേഷമാണ് ഒടിടി പ്ലാറ്റ്‌ഫോമില്‍ റിലീസിനെത്തുന്നത് എന്നതും ശ്രദ്ധേയം (Jawan OTT Release).
താരത്തിന്‍റെ ജന്മദിനത്തോടനുബന്ധിച്ച് ഇന്ന് പുലര്‍ച്ചെ (നവംബര്‍ 2) 12 മണിക്കാണ് 'ജവാന്‍' നെറ്റ്‌ഫ്ലിക്‌സില്‍ സ്‌ട്രീമിങ് ആരംഭിച്ചത്. ഇക്കാര്യം നെറ്റ്‌ഫ്ലിക്‌സ് തങ്ങളുടെ ഔദ്യോഗിക സോഷ്യല്‍ മീഡിയ പ്ലാറ്റ്‌ഫോമായ എക്‌സില്‍ (ട്വിറ്റര്‍) പങ്കുവച്ചു. 'ജന്മദിനം ജവാന്‍റെ, എന്നാല്‍ സമ്മാനം എല്ലാവര്‍ക്കും, നമുക്ക് പോകാം. ജവാന്‍ ഇപ്പോള്‍ ഹിന്ദി, തമിഴ്, തെലുഗു ഭാഷകളില്‍ നെറ്റ്‌ഫ്ലിക്‌സില്‍ മാത്രം സ്‌ട്രീം ചെയ്യുന്നു..' -ഇപ്രകാരമാണ് നെറ്റ്‌ഫ്ലിക്‌സ് എക്‌സില്‍ കുറിച്ചിരിക്കുന്നത്.
ഷാരൂഖ് ഖാന്‍റെ ഒരു സര്പ്രൈസ് വീഡിയോക്കൊപ്പമായിരുന്നു നെറ്റ്‌ഫ്ലിക്‌സിന്‍റെ പോസ്‌റ്റ്. 'എന്‍റെ ജന്മദിനത്തിൽ നിങ്ങള്‍ക്കൊരു സമ്മാനം' -എന്ന് പറഞ്ഞുകൊണ്ടുള്ള ഷാരൂഖിന്‍റെ ജന്മദിന സ്‌പെഷ്യല്‍ വീഡിയോയാണിത്. ഒന്നര മിനിറ്റ് ദൈര്‍ഘ്യമുള്ള വീഡിയോയില്‍ ആദ്യം ആരാധകരുടെ നെഞ്ചിടിപ്പ് കൂട്ടി ഒടുവില്‍ സര്പ്രൈസ് നല്‍കുന്ന ഷാരൂഖിനെയാണ് കാണാനാവുക (Jawan Birthday Special Surprise video).