കൊൽക്കത്ത:ഐപിഎല്ലിൽ ബാംഗ്ലൂർ റോയൽ ചലഞ്ചേഴ്‌സിനെതിരായ മത്സരത്തിൽ ഷാരൂഖ് ഖാനെ സാക്ഷിയാക്കി തകർപ്പൻ ജയമാണ് കൊൽക്കത്ത നൈറ്റ് റൈഡേഴ്‌സ് സ്വന്തമാക്കിയത്. വിരാട് കോലിയടക്കമുള്ള സൂപ്പർ താരങ്ങൾ മൈതാനത്തുള്ളപ്പോഴും ഈഡനിൽ സ്റ്റാറായത് കിങ് ഖാൻ തന്നെയായിരുന്നു. മത്സര ശേഷം മൈതനാത്തിറങ്ങി താരങ്ങളെ അഭിസംബോധന ചെയ്‌ത ഷാരൂഖ് കോലിയോടൊപ്പം തന്‍റെ സൂപ്പർ ഹിറ്റ് ചിത്രമായ പത്താനിലെ ഗാനത്തിന് ചുവട് വെയ്‌ക്കുകയും ചെയ്‌തു.
വർഷങ്ങൾക്ക് ശേഷം ഹോം ഗ്രൗണ്ടിൽ പോരാടാനെത്തിയ കൊൽക്കത്തയുടെ മത്സരം കാണാൻ ടീമിന്‍റെ ഉടമ കൂടിയായ ഷാരൂഖ് ഖാൻ എത്തിയത് ആരാധകരിലും വലിയ ആവേശമാണ് ഉണ്ടാക്കിയത്. വിഐപി ഗ്യാലറിയിരുന്ന താരത്തെ ഓരോ തവണ ബിഗ് സ്ക്രീനിൽ കാണിക്കുമ്പോഴും ആർപ്പുവിളികളോടെയാണ് ആരാധകർ സ്വീകരിച്ചത്. ആരാധകരെ കൈവിശിക്കാണിച്ചും, ഫ്ലൈയിങ് കിസ്സുകൾ നൽകിയും തനിക്ക് നൽകുന്ന പിന്തുണയ്‌ക്ക് നന്ദി അറിയിക്കാനും താരം മറന്നില്ല.
മത്സരത്തിന്‍റെ വിജയത്തിന് ശേഷം അവാർഡ് ദാന ചടങ്ങിന് മുൻപായാണ് ക്രിക്കറ്റ് ലോകത്തെ രാജാവും, ബോളിവുഡിന്‍റെ രാജാവും കണ്ടുമുട്ടിയത്. കോലിയെ കണ്ട പാടേ തന്നെ താരത്തെ കെട്ടിപ്പിടിച്ച് ഷാരൂഖ് വിശേഷങ്ങൾ പങ്കുവെച്ചു. ഇതിന് പിന്നാലെയാണ് പത്താനിലെ 'ജൂമേ ജോ പത്താൻ' എന്ന ഗാനത്തിന്‍റെ ചുവടുകൾ കോലിക്ക് ഷാരൂഖ് പഠിപ്പിച്ച് കൊടുത്തത്. സ്റ്റേഡിയത്തിലുണ്ടായിരുന്ന ആരാധകരും ഇത് കരഘോഷത്തോടെ സ്വീകരിച്ചു.
പിന്നാലെ ഇതിന്‍റെ വീഡിയോ സോഷ്യൽ മീഡിയയിൽ വലിയ രീതിയിൽ വൈറലായി മാറുകയായിരുന്നു. ഷാരൂഖ് ഖാനോടൊപ്പം ടീമിന്‍റെ സഹ ഉടമയായ ജൂഹി ചൗള, ബോളിവുഡ് താരങ്ങളായ സുഹാന ഖാൻ, ഷനായ കപൂർ എന്നിവരും മത്സരം കാണാൻ എത്തിയിരുന്നു. കറുത്ത ഹൂഡിയും സണ്‍ഗ്ലാസും ധരിച്ച് കൂൾ ലുക്കിലാണ് ഷാരൂഖ് ഖാൻ മത്സരം കാണാനെത്തിയത്.