ന്യൂഡൽഹി: കേന്ദ്ര കാർഷിക നിയമങ്ങൾക്കെതിരെയുള്ള കർഷകരുടെ പോരാട്ടം ആറ് മാസം പൂർത്തിയായതിന്‍റെ ഭാഗമായി ഇന്ന് നടത്താനിരിക്കുന്ന പ്രതിഷേധത്തെ നേരിടാൻ ഡൽഹി സിംഘു അതിർത്തിയിലെ സുരക്ഷ ശക്തമാക്കി. 2020 സെപ്തംബറിൽ പ്രാബല്യത്തിൽ വന്ന മൂന്ന് കാർഷിക നിയമങ്ങൾക്കെതിരെയുള്ള പ്രതിഷേധമെന്നോണം രാവിലെ മുതൽ അതിർത്തി പ്രദേശത്ത് ആളുകൾ കൂട്ടംകൂടിയിരുന്നു. കൊവിഡ് വ്യാപനത്തിന്‍റെ സാഹചര്യത്തിൽ പഞ്ചാബ്, ഹരിയാന, ഡൽഹി എന്നിവിടങ്ങളിൽ ലോക്ക്‌ഡൗൺ നിലനിൽക്കുന്നതിനിടയാലാണ് പ്രതിഷേധക്കാർ അതിർത്തിയിൽ ഒത്തുകൂടിയത്.
കൊവിഡ് മാനദണ്ഡങ്ങൾ പാലിക്കണമെന്നും കൂട്ടം കൂടുന്നത് ഒഴിവാക്കണമെന്നും അതിർത്തിയിൽ ഏതെങ്കിലും തരത്തിലുള്ള നിയമവിരുദ്ധ പ്രവർത്തനങ്ങളോ പ്രവേശനമോ അനുവദിക്കില്ലെന്നും നിയമലംഘകർക്കെതിരെ നടപടിയെടുക്കുമെന്നും ഡൽഹി പൊലീസ് അറിയിച്ചു. രാജ്യ തലസ്ഥാനത്ത് റിപ്പബ്ലിക് ദിനത്തിലുണ്ടായ പ്രതിഷേധങ്ങൾ അക്രമത്തിൽ കലാശിക്കുകയും നിരവധി പേർക്ക് പരിക്കേൽക്കുകയും ചെയ്തിരുന്നു.
സംയുക്ത കിസാൻ മോർച്ച ആഹ്വാനം ചെയ്ത പ്രതിഷേധത്തിന് പിന്തുണയർപ്പിച്ച് നിരവധി നേതാക്കൾ രംഗത്തു വന്നു. 12 പ്രധാന പ്രതിപക്ഷ പാർട്ടികൾ നൽകിയ സംയുക്ത പ്രസ്താവനയിൽ നേതാക്കളായ സോണിയ ഗാന്ധി (കോൺഗ്രസ്), എച്ച്ഡി ദേവേഗൗഡ (ജെഡി-എസ്), ശരദ് പവാർ(എൻസിപി), മമത ബാനർജി(ടിഎംസി), ഉദ്ദവ് താക്കറെ(ശിവസേന), എം കെ സ്റ്റാലിൻ(ഡിഎംകെ), ഹേമന്ത് സോറൻ(ജെഎംഎം), ഫറൂഖ് അബ്ദുല്ല (ജെകെപിഎ), അഖിലേഷ് യാദവ്(സമാജ്‌വാദി പാർട്ടി), തേജശ്വി യാദവ്(ആർ‌ജെഡി), ഡി.രാജ(സി‌പി‌ഐ), സീതാറാം യെച്ചൂരി(സി‌പി‌ഐ-എം) എന്നിവർ ഒപ്പിട്ടു.