ന്യൂഡല്‍ഹി :2018ൽ മധ്യപ്രദേശിൽ ഏഴുവയസുകാരിയെ ബലാത്സംഗം ചെയ്‌ത കേസിൽ ഒരു പ്രതിയുടെ വധശിക്ഷ സ്‌റ്റേ ചെയ്‌ത്‌ സുപ്രീം കോടതി. കുറ്റവാളി സമർപ്പിച്ച ഹർജി പരിഗണിക്കവെയാണ് ജസ്‌റ്റിസ് യു യു ലളിത് അധ്യക്ഷനായ ബഞ്ചിന്‍റെ ഉത്തരവ്. കൂടുതൽ പരിഗണനയ്ക്കായി, അപ്പീലിന്മേൽ ചുമത്തപ്പെട്ട വധശിക്ഷ നടപ്പാക്കുന്നത് സ്‌റ്റേ ചെയ്യുന്നതായി കോടതി അറിയിച്ചു.
ജസ്‌റ്റിസുമാരായ എസ് ആർ ഭട്ടും ബേല എം ത്രിവേദിയും അടങ്ങുന്ന ബഞ്ചാണ്‌ ഉത്തരവിട്ടത്‌. കുറ്റവാളിയെ സംബന്ധിച്ച പ്രൊബേഷൻ ഓഫിസറുടെ റിപ്പോർട്ടും ജയിലിൽ വെച്ച് ഇയാള്‍ ചെയ്‌ത ജോലിയുടെ സ്വഭാവത്തെക്കുറിച്ചുള്ള ജയിൽ അഡ്‌മിനിസ്ട്രേഷന്‍റെ റിപ്പോർട്ടും 2022 മാർച്ച് ഒന്നിന് മുമ്പായി സമർപ്പിക്കാൻ സുപ്രീം കോടതി സംസ്ഥാനത്തോട് നിർദ്ദേശിച്ചു.
ഇൻഡോർ ആസ്ഥാനമായുള്ള ഒരു ആശുപത്രിയുടെ ഡയറക്‌ടറോട് പ്രതിയുടെ മാനസിക നില വിലയിരുത്തലിനായി ഒരു ടീമിനെ രൂപീകരിക്കാൻ ബഞ്ച് ആവശ്യപ്പെട്ടു. ഈ വർഷം സെപ്റ്റംബറിൽ പുറപ്പെടുവിച്ച വിധിയിൽ, കേസിലെ രണ്ട് പ്രതികൾക്ക് 2018 ഓഗസ്‌റ്റിൽ വിചാരണ കോടതി വിധിച്ച വധശിക്ഷ ഹൈക്കോടതി ശരിവച്ചിരുന്നു.