ന്യൂഡല്‍ഹി: ഭിന്നശേഷിക്കാര്‍ക്ക് കൊവിഡ് വാക്സിനേഷന് നല്‍കുന്നതുമായി ബന്ധപ്പെട്ട് കേന്ദ്രസര്‍ക്കാരിന് നോട്ടീസ് അയച്ച് സുപ്രീംകോടതി. വിഷയത്തില്‍ രണ്ടാഴ്‌ചയ്ക്കുള്ളില്‍ മറുപടി നല്‍കണമെന്ന് ജസ്റ്റിസ് ഡി.വൈ ചന്ദ്രചൂഡ് അധ്യക്ഷനായ ബെഞ്ച് നിര്‍ദേശിച്ചു. ഭിന്നശേഷിക്കാരുടെ അവകാശങ്ങള്‍ക്ക് വേണ്ടി പ്രവര്‍ത്തിക്കുന്ന സന്നദ്ധ സംഘടനയായ എവര ഫൗണ്ടേഷന്‍ നല്‍കിയ ഹര്‍ജി പരിഗണിയ്ക്കുകയായിരുന്നു കോടതി.
ഭിന്നശേഷിക്കാര്‍ക്ക് കൊവിഡ് ബാധിയ്ക്കാനുള്ള സാധ്യത കൂടുതലായതിനാല്‍ വീടുകളില്‍ പ്രതിരോധ കുത്തിവയ്പ്പ് എടുക്കാനുള്ള സൗകര്യം, വാക്സിനേഷന് ക്രമത്തില്‍ മുന്‍ഗണന, കൊവിന്‍ പോര്‍ട്ടലിന് പുറമേ വാക്സിനേഷന് വേണ്ടി മറ്റൊരു ഹെല്‍പ്പ്ലൈന്‍, വാക്സിനേഷന് കേന്ദ്രങ്ങളിലേക്കുള്ള പ്രവേശനം എന്നി ആവശ്യങ്ങള്‍ ഉന്നയിച്ചാണ് ഹര്‍ജിക്കാര്‍ പരമോന്നത കോടതിയെ സമീപിച്ചത്.