ആതിഥ്യമര്യാദയ്‌ക്കും സൗഹൃദത്തിനും പേരുകേട്ട ആളാണ് ബോളിവുഡ് സൂപ്പർസ്‌റ്റാർ സൽമാൻ ഖാൻ. എന്നാലിപ്പോള്‍ സോഷ്യല്‍ മീഡിയയില്‍ വൈറലാവുന്ന വീഡിയോ താരത്തിന്‍റെ മറ്റൊരു മുഖമാണ് കാണിക്കുന്നത്. സല്‍മാന്‍ ഖാനും വിക്കി കൗശലും തമ്മിലുള്ള ഒരു വീഡിയോ ആണ് സോഷ്യല്‍ മീഡിയയില്‍ തരംഗമായിരിക്കുന്നത്.
ഇന്‍റര്‍നാഷണല്‍ ഇന്ത്യന്‍ ഫിലിം അക്കാദമി അവാര്‍ഡ് 2023ല്‍ (IIFA) പങ്കെടുക്കുന്നതിനിടെയാണ് സല്‍മാന്‍ ഖാനും വിക്കി കൗശലും മുഖാമുഖം കാണുന്നത്. സല്‍മാന്‍ ഖാനെ കണ്ടപ്പോള്‍ വിക്കി കൗശല്‍ അദ്ദേഹത്തിന്‍റെ അടുത്തേക്ക് ചെന്നു. ഉടന്‍ തന്നെ സല്‍മാന്‍റെ അംഗരക്ഷകന്‍ വിക്കി കൗശലിനെ തള്ളിമാറ്റി. ഇതിന്‍റെ വീഡിയോയാണ് സോഷ്യല്‍ മീഡിയയില്‍ പ്രചരിക്കുന്നത്.
അബുദാബിയിൽ നടക്കുന്ന ഐഐഎഫ്എയിൽ സുരക്ഷ കാരണങ്ങളാലാണ് സൽമാൻ ഖാനെ കാണാൻ വിക്കി കൗശലിനെ അനുവദിക്കാതിരുന്നതെന്നാണ് റിപ്പോര്‍ട്ടുകള്‍. സൽമാനും അദ്ദേഹത്തിന്‍റെ സെക്യൂരിറ്റിയും കടന്നു പോകുമ്പോൾ വിക്കി കൗശല്‍ ആരാധകർക്കൊപ്പം സെൽഫി എടുക്കുന്നതാണ് വീഡിയോയിൽ കാണാനാവുക. ഇതിനിടെ എതിര്‍ദിശയില്‍ നിന്നും വരുന്ന സൽമാനൊപ്പമുള്ള താരത്തിന്‍റെ സെക്യൂരിറ്റി, വിക്കി കൗശലിനെ തള്ളിമാറ്റുകയും സല്‍മാനുമായി ഹസ്‌തദാനം ചെയ്യുന്നതില്‍ നിന്നും തടയുകയും ചെയ്യുന്നു.
സല്‍മാന്‍റെ അംഗരക്ഷകരുടെ ഈ പ്രവൃത്തി സോഷ്യൽ മീഡിയയില്‍ വലിയ രീതിയില്‍ ചര്‍ച്ച ചെയ്യപ്പെടുകയാണ്. ഇത് ഓണ്‍ലൈന്‍ പ്ലാറ്റ്‌ഫോമുകളില്‍ വന്‍ വിവാദത്തിന് തിരികൊളുത്തിയിട്ടുണ്ട്. ഇതോടെ സല്‍മാന്‍ ഖാനെതിരെ വിമര്‍ശനങ്ങള്‍ ഉയര്‍ന്നുവെങ്കിലും താരത്തിന്‍റെ ചില ആരാധകര്‍ അദ്ദേഹത്തെ ഈ വിമര്‍ശനങ്ങളില്‍ നിന്നും സംരക്ഷിക്കാന്‍ ശ്രമിച്ചു.