ഐശ്വര്യ രജനികാന്ത് (Aishwarya Rajinikanth) സംവിധാനം ചെയ്യുന്ന 'ലാൽ സലാം' പൊങ്കല്‍ റിലീസായി തിയേറ്ററുകളില്‍ എത്താനുള്ള ഒരുക്കത്തിലാണ്. ജയിലറിന് ശേഷം 'ലാല്‍ സലാമി'ന്‍റെ (Lal Salaam) റിലീസിനുള്ള തയ്യാറെടുപ്പിലാണിപ്പോള്‍ തെന്നിന്ത്യന്‍ സൂപ്പര്‍ താരം രജനികാന്തും (Rajinikanth). മകള്‍ സംവിധാനം ചെയ്യുന്ന ചിത്രത്തില്‍ രജനികാന്ത് അതിഥി വേഷത്തിലാണ് എത്തുന്നത്.
പ്രഖ്യാപനം മുതല്‍ മാധ്യമശ്രദ്ധ നേടിയ സിനിമയുടെ ഓരോ പുതിയ അപ്‌ഡേറ്റുകള്‍ക്കായും ആരാധകര്‍ ആകാംക്ഷയോടെയാണ് കാത്തിരിക്കുന്നത്. ഇപ്പോഴിതാ പുതിയൊരു അപ്‌ഡേറ്റാണ് നിര്‍മാതാക്കള്‍ പുറത്തുവിട്ടിരിക്കുന്നത്.
റെഡ് ജയന്‍റ്‌ മുവീസാണ് 'ലാല്‍ സലാം' തമിഴ്‌നാട്ടിലെ തിയേറ്ററുകളില്‍ റിലീസിനെത്തിക്കുക (Red Gaints Movies releasing Lal Salaam). 'ലാല്‍ സലാം' നിര്‍മാതാക്കളായ ലൈക്ക പ്രൊഡക്ഷന്‍സാണ് ഇക്കാര്യം സോഷ്യല്‍ മീഡിയയിലൂടെ (എക്‌സ്‌) അറിയിച്ചിരിക്കുന്നത്. ഏറ്റവും പുതിയ അപ്‌ഡേറ്റിൽ, ചിത്രം 2024 ല്‍ പൊങ്കല്‍ റിലീസായി തിയേറ്ററുകളില്‍ എത്തുമെന്നും നിർമാതാക്കൾ സ്ഥിരീകരിച്ചു.
തമിഴിന് പുറമെ മലയാളം, ഹിന്ദി, തെലുഗു, കന്നഡ എന്നീ ഭാഷകളിലാണ് ചിത്രം റിലീസിനെത്തുക. നിര്‍മാതാക്കളായ ലൈക്ക പ്രൊഡക്ഷന്‍സാണ് (Lyca Productions) ഇക്കാര്യവും നേരത്തെ സോഷ്യല്‍ മീഡിയയിലൂടെ അറിയിച്ചത്. 2024ല്‍ പൊങ്കല്‍ റിലീസായി 'ലാല്‍ സലാം' തിയേറ്ററുകളില്‍ എത്തും എന്നാണ് ലൈക്ക പ്രൊഡക്ഷന്‍സ് നേരത്തെ എക്‌സില്‍ (ട്വിറ്റര്‍) കുറിച്ചത്.
ലാല്‍ സലാം, ലാല്‍ സലാം പൊങ്കലിന്, മൊയ്‌തീന്‍ ഭായ് പൊങ്കലിന് എത്തും, തലൈവര്‍ ഫീസ്റ്റ് എന്നീ ഹാഷ്‌ടാഗുകളോടുകൂടിയാണ് ലൈക്ക പ്രൊഡക്ഷന്‍സ് അപ്‌ഡേറ്റ് പങ്കുവച്ചത്. റിലീസിനൊപ്പം 'ലാല്‍ സലാമി'ന്‍റെ പുതിയൊരു പോസ്‌റ്ററും നിര്‍മാതാക്കള്‍ പുറത്തുവിട്ടിരുന്നു.