ബോളിവുഡ് ക്യൂട്ട് താരം രൺബീർ കപൂറും Ranbir Kapoor തെന്നിന്ത്യന്‍ താരം രശ്‌മിക മന്ദാനയും Rashmika Mandanna പ്രധാന വേഷങ്ങളില്‍ എത്തുന്ന ചിത്രമാണ് 'അനിമൽ' Animal. അടുത്തിടെയാണ് 'അനിമലി'ന്‍റെ പ്രീ - ടീസർ റിലീസ് ചെയ്‌തത്. ഇത് സോഷ്യല്‍ മീഡിയയില്‍ തരംഗമായി മാറിയിരുന്നു.
കബീർ സിങ് സംവിധായകന്‍ സന്ദീപ് റെഡ്ഡി വംഗ സംവിധാനം ചെയ്യുന്ന ചിത്രം പ്രഖ്യാപനം മുതല്‍ മാധ്യമശ്രദ്ധ നേടിയിരുന്നു. സിനിമയുടെ ഓരോ അപ്‌ഡേറ്റുകള്‍ക്കായും പ്രേക്ഷകര്‍ ആകാംക്ഷയോടെയാണ് കാത്തിരിക്കുന്നത്. ഈ വർഷത്തെ റിലീസുകളില്‍ പ്രേക്ഷകര്‍ വളരെ പ്രതീക്ഷയോടെ കാത്തിരിക്കുന്ന ചിത്രങ്ങളിൽ ഒന്ന് കൂടിയാണ് അനിമല്‍.
പ്രീ - ടീസറിന് ശേഷം സിനിമയുടെ ട്രെയിലർ ലോഞ്ചിനായി ആരാധകർ ശ്വാസമടക്കി കാത്തിരിക്കുമ്പോൾ, ആരാധകര്‍ക്ക് സന്തോഷം നല്‍കുന്ന, ചിത്രത്തിലെ സെറ്റില്‍ നിന്നുള്ള ഏതാനും ചിത്രങ്ങള്‍ സോഷ്യല്‍ മീഡിയയില്‍ പ്രത്യക്ഷപ്പെട്ടിരിക്കുകയാണ്.
രൺബീർ കപൂറും നടി രശ്‌മിക മന്ദാനയും വളരെ മനോഹരമായി, നിഷ്‌കളങ്കമായി പുഞ്ചിരിക്കുന്ന ചിത്രമാണ് സോഷ്യല്‍ മീഡിയയില്‍ തരംഗമായി മാറിയിരിക്കുന്നത്. ചിത്രത്തിന് ആരാധകര്‍ വളരെ രസകരമായ കമന്‍റുകളാണ് പങ്കുവച്ചിരിക്കുന്നത്. 'നീളന്‍ തലമുടിയുള്ള രണ്‍ബീര്‍ കപൂറിന് ദീര്‍ഘായുസ് ലഭിക്കട്ടെ' - ഇപ്രകാരമാണ് ഒരു ആരാധകന്‍റെ കമന്‍റ്. 'രാവണൻ ദുഷ്‌ടനായിരുന്നു, പക്ഷേ ഇദ്ദേഹം (രൺബീർ), 'ആദിപുരുഷി'ലെ സെയ്‌ഫിനെ പോലെ മണ്ടനല്ല.' - മറ്റൊരാള്‍ കുറിച്ചു.
നേരത്തെ അനിമലിലെ ഫസ്‌റ്റ് ലുക്ക് പോസ്‌റ്റർ നിര്‍മാതാക്കള്‍ പുറത്തുവിട്ടിരുന്നു. കൈയിൽ കോടാലി പിടിച്ച് ദേഹമാകെ രക്തക്കറയുമായി സിഗരറ്റ് കത്തിക്കുന്ന രണ്‍ബീറിനെയാണ് ഫസ്‌റ്റ്‌ലുക്കില്‍ കാണാനായത്. ചിത്രത്തില്‍ ഒരു ഗ്യാങ്‌സ്‌റ്ററായാണ് രണ്‍ബീര്‍ കപൂര്‍ പ്രത്യക്ഷപ്പെടുന്നത് എന്നാണ് സൂചന.