'കേന്ദ്രസർക്കാർ വാഗ്‌ദാനങ്ങൾ പാലിച്ചില്ല' : വഞ്ചനാദിനം ആചരിക്കുമെന്ന് ബികെയു

ജനുവരി 31ന് വഞ്ചനാദിനം ആചരിക്കുമെന്ന് ബികെയു നേതാവ് രാകേഷ്‌ ടിക്കായത്ത്.

നോയിഡ: കർഷക സമരം പിൻവലിക്കാനായി കേന്ദ്രസർക്കാർ ഉറപ്പു നൽകിയ വാഗ്‌ദാനങ്ങൾ പാലിച്ചില്ലെന്ന ആരോപണവുമായി ഭാരതീയ കിസാൻ യൂണിയൻ. വിഷയത്തിൽ കർഷകരുടെ പ്രതിഷേധം രേഖപ്പെടുത്തി ജനുവരി 31ന് വഞ്ചനാദിനം ആചരിക്കുമെന്ന് ബികെയു നേതാവ് രാകേഷ്‌ ടിക്കായത്ത് പറഞ്ഞു.

കേന്ദ്രസർക്കാർ ഡിസംബർ ഒമ്പതിന് എഴുതി നൽകിയ വാഗ്‌ദാനങ്ങൾ പാലിച്ചില്ലെന്നും കർഷകരെ വഞ്ചിക്കുകയായിരുന്നുവെന്നുമാണ് കർഷകരുടെ ആരോപണം. ട്വിറ്ററിലൂടെയായിരുന്നു നേതാവിന്‍റെ പ്രതികരണം. വിവാദമായ കാർഷിക നിയമങ്ങൾ പിൻവലിക്കണമെന്നാവശ്യപ്പെട്ട് 2020 നവംബർ മാസം മുതലാണ് കർഷകർ രാജ്യതലസ്ഥാനത്ത് പ്രതിഷേധം ആരംഭിച്ചത്.

ഒരു വർഷം നീണ്ടു നിന്ന സമരത്തിന് മുന്നിൽ കേന്ദ്ര സർക്കാർ ഒടുവിൽ മുട്ടുമടക്കുകയായിരുന്നു. സിങ്കു, തിക്രി, ഗാസിപൂർ അതിർത്തി പ്രദേശങ്ങളിലാണ് കർഷകർ നിയമത്തിനെതിരെ പ്രതിഷേധിച്ചത്. നവംബർ 2021ലാണ് പ്രധാനമന്ത്രി നരേന്ദ്രമോദി കർഷക നിയമങ്ങൾ പിൻവലിച്ചത്.