ഔറംഗാബാദ് : പള്ളികളില്‍ ഉച്ചഭാഷിണി ഉപയോഗിക്കുന്നതുമായി ബന്ധപ്പെട്ട് നടത്തിയ വിദ്വേഷ പരാമര്‍ശങ്ങളില്‍ മഹാരാഷ്ട്ര നവനിർമാൺ സേന (എംഎൻഎസ്) മേധാവി രാജ് താക്കറെക്കെതിരെ കേസെടുത്ത് പൊലീസ്. സംഭവത്തിന് പിന്നാലെ ആഭ്യന്തര മന്ത്രി ദിലീപ് വാൽസ് പാട്ടീലും ഡിജിപി രജനീഷ് സേത്തും മുംബൈയിൽ കൂടിക്കാഴ്‌ച നടത്തി സ്ഥിതിഗതികള്‍ വിലയിരുത്തുകയും ചെയ്‌തു.
പ്രസംഗത്തില്‍ താക്കറെക്കെതിരെ ഉചിതമായ നടപടി സ്വീകരിക്കുമെന്ന് ഡിജിപി രജനീഷ് സേത്ത് അറിയിച്ചു. കേസുമായി ബന്ധപ്പെട്ട് 13,000ല്‍ അധികം പേര്‍ക്കെതിരെ കേസ് രജിസ്റ്റര്‍ ചെയ്തതായും അദ്ദേഹം കൂട്ടിച്ചേര്‍ത്തു. പ്രസംഗം പരിശോധിച്ച് വരികയാണ്. മെയ് മൂന്നിനകം പള്ളികളിൽ നിന്ന് ഉച്ചഭാഷിണികൾ നീക്കം ചെയ്യണമെന്ന് താക്കറെ നേരത്തെ പറഞ്ഞിരുന്നു. അതിന്‍റെ പശ്ചാത്തലത്തിലാണ് മെയ് മൂന്നിന് മുന്നോടിയായി താക്കറെ റാലി നടത്തിയത്.