മുംബൈ : ടൗട്ടെ ചുഴലിക്കാറ്റ് മുന്നറിയിപ്പ് കണക്കിലെടുത്ത് ഇന്ത്യൻ റെയിൽവേ ചില ട്രെയിനുകൾ റദ്ദാക്കിയേക്കും. മെയ് 17, 18 തിയ്യതികളില്‍ ഗുജറാത്ത് തീരദേശ മേഖലയിൽ ചുഴലിക്കാറ്റ് ഉണ്ടാകുമെന്ന മുന്നറിയിപ്പ് വന്നതോടെ ചില ട്രെയിനുകൾ റദ്ദാക്കുകയോ എണ്ണം ചുരുക്കുകയോ ചെയ്യുമെന്ന് വെസ്റ്റേൺ റെയിൽവേ ചീഫ് പബ്ലിക് റിലേഷൻസ് ഓഫീസർ സുമിത് താക്കൂർ അറിയിച്ചു. ഞായറാഴ്‌ചയോടെ ടൗട്ടെ കൂടുതൽ ശക്തി പ്രാപിക്കുമെന്ന് കാലാവസ്ഥ വകുപ്പ് മുന്നറിയിപ്പ് നല്‍കിയിരുന്നു.
മെയ് 18 ന് രാവിലെയോടെ ടൗട്ടെ ഗുജറാത്ത് തീരം തൊട്ടേക്കും. അപകടസാധ്യത കണക്കിലെടുത്ത് മത്സ്യത്തൊഴിലാളികൾ കടലിൽ പോകരുതെന്ന് നിർദേശിച്ചിട്ടുണ്ട്. തെക്കുകിഴക്കൻ അറേബ്യൻ കടലിലും കേരള, കർണാടക, ഗോവ, മഹാരാഷ്ട്ര തീരങ്ങളിലും മത്സ്യബന്ധനം നിരോധിച്ചിരിക്കുകയാണ്.