ഇംഫാല്‍ : ലോക്‌സഭ തെരഞ്ഞെടുപ്പ് മുന്നില്‍ നില്‍ക്കെ കോൺഗ്രസ് നേതാവ് രാഹുല്‍ ഗാന്ധി (Rahul Gandhi) നടത്തുന്ന ഭാരത് ജോഡോ ന്യായ് യാത്രയ്‌ക്ക് ഇന്ന് തുടക്കമാകും. മണിപ്പൂരിലെ തൗബലിലെ ഖോങ്‌ജോം യുദ്ധസ്‌മാരകത്തിന് സമീപത്തുനിന്നാണ് യാത്ര ആരംഭിക്കുക. ഉച്ചക്ക് 12ന് കോൺഗ്രസ് അധ്യക്ഷൻ മല്ലികാർജുൻ ഖാർഗെ യാത്ര ഫ്ലാഗ് ഓഫ് ചെയ്യും (Rahul Gandhi Set to Embark on Bharat Jodo Nyay Yatra).
തലസ്ഥാനമായ ഇംഫാലിൽ പരിപാടി നടത്താൻ സംസ്ഥാന സർക്കാർ അനുമതി നിഷേധിച്ചതിനെ തുടർന്നാണ് നഗരത്തിന് പുറത്തുള്ള ഖോങ്‌ജോം യുദ്ധസ്‌മാരക സമുച്ചയത്തിന് സമീപത്തുനിന്ന് യാത്ര തുടങ്ങുന്നത്. ഉച്ചയ്ക്ക് നടക്കുന്ന പൊതുസമ്മേളനത്തിൽ കോൺഗ്രസ് മുഖ്യമന്ത്രിമാരായ സിദ്ധരാമയ്യ, എ രേവന്ത് റെഡ്ഡി, സുഖ്‌വിന്ദർസിങ് സുഖു തുടങ്ങിയവർക്കൊപ്പം പാർട്ടിയുടെ പ്രവർത്തക സമിതി അംഗങ്ങളും, നിയമസഭ കക്ഷി നേതാക്കളും പങ്കെടുക്കും. സുരക്ഷാകാരണങ്ങളാൽ സോണിയ ഗാന്ധി ഉദ്‌ഘാടന ചടങ്ങിൽ സംബന്ധിക്കില്ല (Manipur Bharat Jodo Nyay Yatra).
ഈ വര്‍ഷം നടക്കാനിരിക്കുന്ന ലോക്‌സഭ തെരഞ്ഞെടുപ്പിന് മുന്നോടിയായാണ് തൊഴിലില്ലായ്‌മ, വിലക്കയറ്റം, സാമൂഹിക നീതി തുടങ്ങിയ വിഷയങ്ങളില്‍ പാര്‍ട്ടിയുടെ ശ്രദ്ധ കേന്ദ്രീകരിക്കുക എന്ന ലക്ഷ്യത്തോടെ രാഹുൽ ഭാരത് ജോഡോ ന്യായ് യാത്ര നടത്തുന്നത് (Lok Sabha Election 2024). 15 സംസ്ഥാനങ്ങളിലെ 100 ലോക്‌സഭ മണ്ഡലങ്ങളിലൂടെ ന്യായ് യാത്ര പര്യടനം നടത്തും. ഭാരത് ജോഡോ യാത്രയ്‌ക്ക് (Bharat Jodo Yatra) സമാനമായ രീതിയില്‍ ചലനം സൃഷ്‌ടിക്കാന്‍ ന്യായ് യാത്രയ്‌ക്കും കഴിയുമെന്ന പ്രതീക്ഷയിലാണ് കോണ്‍ഗ്രസ് നേതൃത്വം.