ന്യൂഡല്‍ഹി: തെരഞ്ഞെടുപ്പ് വോട്ടെണ്ണൽ അന്തിമ ഫല പ്രഖ്യാപനത്തിലേക്കടുക്കുമ്പോൾ പ്രതികരണവുമായി കോൺഗ്രസ് നേതാവ് രാഹുൽ ഗാന്ധി. ജനവിധി അംഗീകരിക്കുന്നു. തെരഞ്ഞെടുപ്പ് വിധിയിൽ നിന്ന് പാഠം ഉൾക്കൊള്ളുമെന്നും ഇന്ത്യയിലെ ജനങ്ങളുടെ താത്പര്യങ്ങൾക്കായി പ്രവർത്തിക്കുമെന്നും രാഹുൽ ഗാന്ധി ട്വിറ്ററിൽ കുറിച്ചു. എല്ലാ കോൺഗ്രസ് പ്രവർത്തകർക്കും അനുഭാവികൾക്കും അവരുടെ കഠിനാധ്വാനത്തിനും അർപ്പണ ബോധത്തിനും നന്ദി അറിയിക്കുന്നുവെന്നും രാഹുൽ ഗാന്ധി പറഞ്ഞു.
വോട്ടെണ്ണൽ അന്തിമ ഘട്ടത്തിലേക്കടുക്കുമ്പോൾ വിജയം കൊയ്യുമെന്ന് പ്രതീക്ഷിച്ച ഉത്തർപ്രദേശിൽ കോൺഗ്രസ് മൂന്ന് സീറ്റുകളിലേക്ക് ഒതുങ്ങുന്ന കാഴ്‌ചയാണ് ദേശീയ തലത്തിൽ കാണാനാകുന്നത്. ഉത്തരാഖണ്ഡിലും മികച്ച പ്രകടനം കാഴ്‌ചവയ്ക്കാൻ കോൺഗ്രസിന് കഴിഞ്ഞില്ല. നാല് സംസ്ഥാനങ്ങളിലും ബിജെപി ഭരണം പിടിച്ചടക്കാൻ ഒരുങ്ങുകയാണ്.