ന്യൂഡല്‍ഹി :മുതിർന്ന വ്യവസായിയും ബജാജ് ഗ്രൂപ്പ് മുന്‍ ചെയർമാനുമായ രാഹുൽ ബജാജ് (83) അന്തരിച്ചു. പുനെയില്‍ അര്‍ബുദ ചികിത്സയിലായിരുന്നു. ശനിയാഴ്‌ച ഉച്ചയ്‌ക്ക് 2.30 നാണ് അന്ത്യം. അന്ത്യകർമങ്ങൾ ഞായറാഴ്‌ച നടക്കും.
ബജാജ് ഓട്ടോ കമ്പനിയുടെ നോൺ എക്‌സിക്യുട്ടീവ് ഡയറക്‌ടര്‍, ചെയർമാന്‍ എന്നീ സ്ഥാനങ്ങളില്‍ നിന്നും 2021 ഏപ്രിൽ 30 ന് അദ്ദേഹം ഒഴിയുകയുണ്ടായി. ബജാജിന്‍റെ വൈവിധ്യവത്‌കരണത്തിനായി നിര്‍ണായക പങ്കാണ് അദ്ദേഹം വഹിച്ചത്. 2001 ല്‍ പദ്‌മഭൂഷണ്‍ നല്‍കി രാജ്യം ആദരിച്ചു. 2006 മുതല്‍ 2010 വരെ രാജ്യസഭാംഗമായും പ്രവര്‍ത്തിച്ചു.