ന്യൂഡൽഹി:തന്‍റെ പ്രിയപ്പെട്ട യൂട്യൂബറെ കാണാൻ പഞ്ചാബിൽ നിന്നും ഡൽഹിയിലേക്ക് സൈക്കളിൽ യാത്ര ചെയ്‌ത് 13കാരൻ. യൂട്യൂബില്‍ 'ട്രിഗര്‍ഡ് ഇന്‍സാന്‍' എന്ന പേരിലറിയപ്പെടുന്ന നിശ്ചയ് മല്‍ഹാനെ കാണാനാണ് കുട്ടി പഞ്ചാബിലെ പട്യാലയിൽ നിന്നും ഡൽഹിയിലേക്ക് 250 കിലോമീറ്ററിലധികം സൈക്കിളിൽ യാത്ര ചെയ്‌തത്. തുടർന്ന് കുട്ടിയെ കാണാനില്ലെന്ന രക്ഷിതാക്കളുടെ പരാതിയിൽ അന്വേഷണം നടത്തിയ പട്യാല പൊലീസ് ഡൽഹി പൊലീസിന്‍റെ സഹായത്തോടെ കുട്ടിയെ കണ്ടെത്തി.
എട്ടാം ക്ലാസ് വിദ്യാർഥിയായ കുട്ടിയെ ഒക്‌ടോബർ 4നാണ് കാണാതായത്. തുടർന്ന് പൊലീസിൽ പരാതി നൽകിയ ബന്ധുക്കൾ കുട്ടി നിശ്ചയ്‌യുടെ വലിയ ആരാധകനാണെന്നും അദ്ദേഹത്തെ കാണാൻ പോകാൻ സാധ്യതയുണ്ടെന്നും പൊലീസിനെ അറിയിച്ചു. പട്യാല പൊലീസ് കുട്ടിയെ കണ്ടെത്താനായി സമൂഹ മാധ്യമങ്ങളിലൂടെ ശ്രമിക്കുകയും ഡൽഹി പൊലീസുമായി ബന്ധപ്പെടുകയും ചെയ്‌തു.