നേതാജിയുടെ ധീരതയെ ബഹുമാനിക്കുന്നുവെന്ന് രാഷ്ട്രപതി; ത്യാഗം ഓർക്കുന്നുവെന്ന് പ്രധാനമന്ത്രി

പരാക്രം ദിവസ് ആഘോഷത്തിന്‍റെ ഭാഗമായി പ്രധാനമന്ത്രി കൊൽക്കത്തയിലെ നേതാജി ഭവൻ സന്ദർശിക്കും.

ന്യൂഡൽഹി:സ്വാതന്ത്ര സമര സേനാനിയും നവോത്ഥാന നായകനുമായ നേതാജി സുഭാഷ് ചന്ദ്രബോസിന്‍റെ 125-ാം ജന്മവാർഷിക ദിനത്തിൽ പ്രധാനമന്ത്രി നരേന്ദ്ര മോദിയും രാഷ്‌ട്രപതി രാം നാഥ് കോവിന്ദും നേതാജിയെ അനുസ്മരിച്ചു.

ഇന്ത്യയുടെ സ്വാതന്ത്ര്യസമരത്തിൽ അസാധാരണമായ സംഭാവന നൽകിയ ഏറ്റവും പ്രിയപ്പെട്ട ദേശീയ നായകൻമാരിലൊരാളാണ് നേതാജി എന്നാണ് രാഷ്‌ട്രപതി അദ്ദേഹത്തെ വിശേഷിപ്പിച്ചത്. ജന്മദിനത്തിൽ അദ്ദേഹത്തിന്‍റെ ധീരതയെ ബഹുമാനിക്കുന്നുവെന്നും ഈ ദിവസം" പരാക്രം ദിവാസ് "ആയി ആഘോഷിക്കുന്നത് ഉചിതമാണെന്നും രാഷ്‌ട്രപതി ട്വീറ്റ് ചെയ്‌തു. തന്‍റെ അനുയായികളിൽ നേതാജി ദേശീയതയുടെ ആവേശം പകർന്നു നൽകിയെന്നും നേതാജിയുടെ ദേശസ്‌നേഹവും ത്യാഗവും എല്ലാം നമ്മളെ എപ്പോഴും പ്രചോദിപ്പിക്കുമെന്നും രാഷ്‌ട്രപതി ട്വീറ്റിൽ കുറിച്ചു.

രാജ്യത്തിന്‍റെ സ്വാതന്ത്ര്യത്തിനായി സുഭാഷ് ചന്ദ്രബോസ് ചെയ്‌ത ത്യാഗം എന്നും ഓർമിക്കുമെന്നാണ് പ്രധാന മന്ത്രി ട്വീറ്റ് ചെയ്‌തത്. മഹാനായ സ്വാതന്ത്ര്യസമര സേനാനിയായിരുന്നു സുഭാഷ് ചന്ദ്രബോസെന്നും പ്രധാനമന്ത്രി ട്വീറ്റ് ചെയ്തു.

1897 ജനുവരി 23 നാണ് ഒഡീഷയിലെ കട്ടക്കിൽ നേതാജി സുഭാഷ് ചന്ദ്രബോസ് ജനിച്ചത്. സ്വാതന്ത്ര്യസമരത്തിൽ അദ്ദേഹം പ്രധാന പങ്കുവഹിച്ചിരുന്നു. 1945 ഓഗസ്‌റ്റ് 18ന് തായ്‌പേ വിമാനാപകടത്തിൽ മരിച്ചു എന്ന് റിപ്പോർട്ടുകൾ വന്നു എങ്കിലും അതുമായി ബന്ധപ്പെട്ട് നിരവധി അഭ്യൂഹങ്ങൾ ഉയർന്നു വന്നു. എന്നാൽ 2017 ൽ വിവരാവകാശ നിയമത്തിൽ അദ്ദേഹം മരിച്ചു എന്ന് കേന്ദ്രസർക്കാർ സ്ഥിരീകരിച്ചിരുന്നു.