കാർഗില്‍ പോരാളികള്‍ക്ക് ആദരമർപ്പിക്കണമെന്ന് ജനങ്ങളോട് പ്രധാനമന്ത്രി

കാര്‍ഗില്‍ യുദ്ധവിജയത്തിന്‍റെ 22ആം വാർഷികം ആഘോഷിക്കാൻ വിപുലമായ പദ്ധതികളാണ് കേന്ദ്രസർക്കാർ ആവിഷ്‌കരിച്ചിരിക്കുന്നത്.

ന്യൂഡൽഹി : കാർഗിലില്‍ യുദ്ധത്തില്‍ രാജ്യത്തിനായ പോരാടിയവർക്കും ജീവൻ നഷ്‌ട്ടപ്പെടുത്തിയവർക്കും ആദരവർപ്പിക്കാൻ ജനങ്ങളോട് അഭ്യർഥിച്ച് പ്രധാനമന്ത്രി നരേന്ദ്ര മോദി. പ്രതിമാസ റേഡിയോ പരിപാടി മൻ കി ബാത്തില്‍ സംസാരിക്കുകയായിരുന്നു പ്രധാനമന്ത്രി. ജൂലൈ 26നാണ് രാജ്യം കാർഗില്‍ വിജയ് ദിവസമായി ആചരിക്കുന്നത്.

ലോകം മുഴുവൻ സാക്ഷ്യം വഹിച്ച നമ്മുടെ സുരക്ഷ സേനയുടെ വീര്യത്തിന്‍റെയും അച്ചടക്കത്തിന്‍റെയും പ്രതീകമാണ് കാർഗിൽ യുദ്ധം എന്ന് ഇന്ത്യൻ സായുധ സേനയെ അഭിനന്ദിച്ച പ്രധാനമന്ത്രി പറഞ്ഞു.

"നാളെ കാർഗിൽ വിജയ ദിവസമാണ് ആണ്. ഇന്ത്യയൊട്ടാകെ ഈ ദിവസം 'അമൃത് മഹോത്സവ്' ആയി ആഘോഷിക്കും. ലോകം മുഴുവൻ സാക്ഷ്യം വഹിച്ച നമ്മുടെ സായുധ സേനയുടെ വീര്യത്തിന്‍റെയും അച്ചടക്കത്തിന്‍റെയും പ്രതീകമാണ് കാർഗിൽ യുദ്ധം. ആവേശകരമായ ആ സംഭവങ്ങളെക്കുറിച്ച് നിങ്ങള്‍ വായിക്കണം. കാർഗിലില്‍ നമുക്കായി പോരാടിയ ഓരോരുത്തരെയും നമുക്ക് അഭിവാദ്യം ചെയ്യാം ". - മോദി പറഞ്ഞു.

അമൃത് മഹോത്സവത്തിന് വൻ ഒരുക്കങ്ങള്‍

2022 ഓഗസ്റ്റ് 15ന് ഇന്ത്യയുടെ 75-ാമത് സ്വാതന്ത്ര്യദിനത്തോടനുബന്ധിച്ച് ആഘോഷിക്കുന്ന അമൃത് മഹോത്സവത്തിന്‍റെ ഭാഗമായി രാജ്യത്തുടനീളം നടക്കുന്ന പരിപാടികളിൽ പങ്കെടുക്കണമെന്ന് പ്രധാനമന്ത്രി എല്ലാ പൗരന്മാരോടും അഭ്യർഥിച്ചു.

കാര്‍ഗില്‍ യുദ്ധവിജയത്തിന്‍റെ 22ആം വാർഷികം ആഘോഷിക്കാൻ വിപുലമായ പദ്ധതികളാണ് കേന്ദ്രസർക്കാർ ആവിഷ്‌കരിച്ചിരിക്കുന്നത്. ഇതിനായി കേന്ദ്ര ആഭ്യന്തരമന്ത്രി അമിത് ഷായുടെ നേതൃത്വത്തിലുള്ള പ്രത്യേക കമ്മിറ്റിക്കും രൂപം നല്‍കിയിട്ടുണ്ട്.

1999 ജൂലൈ 26നാണ് പാകിസ്ഥാന്‍റെ നുഴഞ്ഞുകയറ്റത്തെ പരാജയപ്പെടുത്തി ഇന്ത്യ കാര്‍ഗില്‍ യുദ്ധം ജയിച്ചത്.