മോദി-ബോറിസ്‌ ജോൺസൺ ഉഭയകക്ഷി ഉച്ചകോടി ഇന്ന്‌

പ്രാദേശിക, ആഗോള പ്രശ്‌നങ്ങളിൽ സഹകരണം വർധിപ്പിക്കുന്നതിന്‌ ഉച്ചകോടിയിൽ പ്രാധാന്യം നൽകുമെന്ന്‌ വിദേശകാര്യ മന്ത്രാലയം അറിയിച്ചു

ന്യൂഡൽഹി: പ്രധാനമന്ത്രി നരേന്ദ്രമോദിയും ബ്രിട്ടീഷ്‌ പ്രധാനമന്ത്രി ബോറിസ്‌ ജോൺസണും തമ്മിലുള്ള ഉഭയകക്ഷി ഉച്ചകോടി ഇന്ന്‌. വെർച്വലായാണ്‌ യോഗം നടക്കുന്നത്‌. പ്രാദേശിക, ആഗോള തലത്തിൽ സഹകരണം വർധിപ്പിക്കുന്നതിന്‌ ഉച്ചകോടിയിൽ പ്രാധാന്യം നൽകുമെന്ന്‌ വിദേശകാര്യ മന്ത്രാലയം അറിയിച്ചു. കൂടാതെ പ്രതിരോധം ,ആരോഗ്യം, കാലാവസ്ഥാ എന്നീ മേഖലകളിൽ ഇരു രാജ്യങ്ങളും തമ്മിലുള്ള സഹകരണം ഉറപ്പ്‌ വരുത്തും. ഉഭയകക്ഷി ചർച്ചകൾക്കായി ബോറിസ്‌ ജോൺസൺ ഏപ്രിലിൽ ഇന്ത്യ സന്ദർശിക്കാനിരിക്കെയാണ്‌ കൊവിഡിന്‍റെ രണ്ടാം തരംഗം വ്യാപിച്ചത്‌. തുടർന്ന്‌ ഇന്ത്യാ സന്ദർശനം മാറ്റിവെക്കുകയായിരുന്നു.