ന്യൂഡൽഹി :പാരാലിമ്പിക്സിൽ പുരുഷൻമാരുടെ 50 മീറ്റര്‍ എയര്‍ പിസ്റ്റള്‍ എസ്എച്ച്1 വിഭാഗത്തിൽ യഥാക്രമം സ്വർണം, വെള്ളി മെഡലുകൾ നേടിയ മനീഷ് നർവാൾ, സിങ് രാജ് എന്നിവരെ അഭിനന്ദിച്ച് പ്രധാനമന്ത്രി നരേന്ദ്ര മോദിയും ഇന്ത്യയുടെ ആദ്യ വ്യക്തിഗത ഒളിമ്പിക്സ് സ്വർണ മെഡൽ ജേതാവ് അഭിനവ് ബിന്ദ്രയും.
ഇരുവരുടെയും മെഡൽ നേട്ടം രാജ്യത്തിന് മുതൽക്കൂട്ടാണെന്നും അതില്‍ രാജ്യം അഭിമാനിക്കുന്നുവെന്നും പ്രധാനമന്ത്രി ട്വിറ്ററിൽ കുറിച്ചു. ഇരുവരെയും അദ്ദേഹം അഭിനന്ദിച്ചു. ഒരു രാജ്യമെന്ന നിലയിൽ പാരാലിമ്പിക് ടീമിനും ജേതാക്കൾക്കും നൽകാൻ കഴിയുന്ന ഏറ്റവും വലിയ സമ്മാനമെന്നത് ഭിന്നശേഷിക്കാരായ ജനതയെ കൂടുതൽ ഉൾക്കൊള്ളുന്നതിനുള്ള മാർഗമായി ഈ അവസരം പ്രയോജനപ്പെടുത്തുക എന്നതാണെന്ന് അഭിനവ് ബിന്ദ്രയും ട്വീറ്റ് ചെയ്തു.