പ്രധാനമന്ത്രി സംഗ്രഹാലയ : ചരിത്രത്തിലേക്കുള്ള തിരിഞ്ഞുനോട്ടം ; ഉദ്ഘാടനം ചെയ്‌ത് നരേന്ദ്രമോദി

ഇന്ത്യയിലെ എല്ലാ പ്രധാനമന്ത്രിമാരുടെയും ജീവചരിത്രവും സംഭാവനകളും പ്രദർശിപ്പിക്കുന്ന 'പ്രധാനമന്ത്രി സംഗ്രഹാലയ' മ്യൂസിയം നരേന്ദ്ര മോദി രാജ്യത്തിന് സമര്‍പ്പിച്ചു

ന്യൂഡൽഹി: രാജ്യത്തെ എല്ലാ പ്രധാനമന്ത്രിമാരുടെയും ചരിത്രവും സംഭാവനകളും പ്രദർശിപ്പിക്കുന്ന 'പ്രധാനമന്ത്രി സംഗ്രഹാലയ' മ്യൂസിയം പ്രധാനമന്ത്രി നരേന്ദ്ര മോദി ഉദ്ഘാടനം ചെയ്തു. ആസാദി കാ അമൃത് മഹോത്സവ് ആഘോഷത്തിന്‍റെ ഭാഗമായാണ് ഇത് സാക്ഷാത്കരിച്ചത്.

പ്രധാനമന്ത്രിമാരെയും ചരിത്രത്തെയും അറിയാം : 43 ഗാലറികളുള്ള സംഗ്രഹാലയത്തിൽ, ആദ്യ പ്രധാനമന്ത്രി ജവഹർലാൽ നെഹ്‌റു മുതൽ മൻമോഹൻ സിങ് വരെയുള്ളവരുടെ ജീവചരിത്രവും സംഭാവനകളുമുണ്ട്. സ്വാതന്ത്ര്യസമരവും ഭരണഘടനാ രൂപീകരണവും സംബന്ധിച്ച പ്രദർശനങ്ങള്‍ ഉള്‍പ്പെടുത്തിയിട്ടുമുണ്ട്. വിവിധ പ്രധാനമന്ത്രിമാർ തങ്ങൾ നേരിട്ട വെല്ലുവിളികളിലൂടെ രാഷ്‌ട്രത്തെ എങ്ങനെ നയിക്കുകയും രാജ്യത്തിന്‍റെ സർവതോന്മുഖമായ പുരോഗതി ഉറപ്പാക്കുകയും ചെയ്‌തെന്നും സംഗ്രഹാലയ വിശദീകരിക്കുന്നു.

ഡൽഹിയിലെ ജവഹർലാൽ നെഹ്‌റുവിന്‍റെ പേരിൽ അറിയപ്പെടുന്ന തീൻമൂർത്തി ഭവൻ ബ്ലോക്ക് 1 എന്നും, അതിനോടടുത്ത് പുതുതായി നിർമിക്കുന്ന കെട്ടിടം ബ്ലോക്ക് 2 എന്നും അറിയപ്പെടും. 15,600 ചതുരശ്ര മീറ്റർ വിസ്‌തീർണമുള്ള ഈ രണ്ട് ബ്ലോക്കുകളെയും സമന്വയിപ്പിക്കുന്നതാണ് പ്രധാനമന്ത്രി സംഗ്രഹാലയ.

സ്വാതന്ത്ര്യലേക്ക് ഉദിച്ചുയരുന്ന ഇന്ത്യയുടെ ചരിത്രത്തിൽ നിന്ന് പ്രചോദനം ഉൾക്കൊണ്ടാണ് മ്യൂസിയം കെട്ടിടത്തിന്‍റെ രൂപകൽപന. രാഷ്‌ട്രത്തിന്‍റെയും ജനാധിപത്യത്തിന്‍റെയും പ്രതീകമായ ധർമചക്രമേന്തിയ ഇന്ത്യൻ പൗരരുടെ കൈകളെയാണ് സംഗ്രഹാലയത്തിന്‍റെ ലോഗോ പ്രതിനിധീകരിക്കുന്നത്.

അത്യാധുനിക സാങ്കേതികവിദ്യ ഉപയോഗിച്ചിട്ടുള്ള മ്യൂസിയത്തിൽ ഹോളോഗ്രാം, വെർച്വൽ റിയാലിറ്റി, ഓഗ്‌മെന്‍റഡ് റിയാലിറ്റി, മൾട്ടി-ടച്ച്, മൾട്ടിമീഡിയ, ഇന്‍ററാക്‌ടിവ് കിയോസ്‌ക്കുകൾ, കമ്പ്യൂട്ടറൈസ്‌ഡ് കൈനറ്റിക് ശിൽപങ്ങൾ, സ്‌മാർട്ട്‌ഫോൺ ആപ്ലിക്കേഷനുകൾ, ഇന്‍ററാക്‌ടീവ് സ്‌ക്രീനുകൾ, എക്‌സ്പീരിയൻഷ്യൽ ഇൻസ്റ്റാളേഷനുകൾ തുടങ്ങിയവയിലൂടെ വിവരങ്ങൾ സംവേദനാത്മകവും ആകർഷകവുമായ രീതിയിൽ അവതരിപ്പിക്കുന്നു.