പെഗാസസ് : ഫോണുമായി വിദഗ്‌ധ സമിതിക്ക് മുന്നിൽ ഹാജരാകേണ്ട സമയപരിധി ഫെബ്രുവരി 8വരെ നീട്ടി

ഫോൺ ചോർത്തിയതായി തെളിയിക്കുന്നതിന് ന്യായമായ കാരണങ്ങളുള്ളവർ ഫെബ്രുവരി എട്ടിനോ അതിന് മുമ്പോ മുന്നോട്ട് വരാനും പാനലുമായി ബന്ധപ്പെടാനും സുപ്രീംകോടതി നിയുക്ത വിദഗ്‌ധ സമിതി ആവശ്യപ്പെട്ടു

ന്യൂഡൽഹി :പെഗാസസ് ഫോൺ ചോർത്തലിന് വിധേയരായവരിൽ നിന്ന് സുപ്രീംകോടതി നിയോഗിച്ച സാങ്കേതിക സമിതി വിവരങ്ങൾ തേടിയിരുന്നെങ്കിലും രണ്ട് പേർ മാത്രം തങ്ങളുടെ ഫോണുകൾ സമിതിക്ക് മുന്നിൽ ഹാജരാക്കിയ പശ്ചാത്തലത്തിൽ കൂടുതൽ ബാധിതർക്ക് മുന്നോട്ട് വരുന്നതിനുള്ള സമയപരിധി ഫെബ്രുവരി എട്ട് വരെ നീട്ടി. പെഗാസസ് ഫോൺ ചോർത്തൽ വിവാദത്തിൽ പുതിയ ആരോപണങ്ങൾ ഉയരുന്ന സാഹചര്യത്തിലാണ് നടപടി.

2017ൽ ഇസ്രയേലുമായുള്ള രണ്ട് ബില്യൺ യുഎസ് ഡോളർ പ്രതിരോധ കരാറിന്‍റെ ഭാഗമായാണ് ഇന്ത്യ പെഗാസസ് സ്‌പൈവെയർ വാങ്ങിയതെന്ന് അവകാശപ്പെടുന്ന ന്യൂയോർക്ക് ടൈംസ് റിപ്പോർട്ട് വലിയ വിവാദത്തിന് കാരണമായിരുന്നു. പിന്നാലെ, കേന്ദ്രം നടത്തിയ ഒളിച്ചുകളി രാജ്യദ്രോഹത്തിന് തുല്യമായ നിയമവിരുദ്ധ പ്രവർത്തനമാണെന്ന് ആരോപിച്ച് പ്രതിപക്ഷവും രംഗത്തുവന്നു.

ഫോൺ ചോർത്തലിന് വിധേയരായവരോട് വിവരാന്വേഷണത്തിനായി മുന്നോട്ട് വരണമെന്ന് അഭ്യർഥിച്ചതില്‍ ഡിജിറ്റൽ ഇമേജുകൾ എടുക്കുന്നതിന് സമ്മതം പ്രകടിപ്പിച്ചുകൊണ്ട് രണ്ട് പേർ മാത്രമാണ് തങ്ങളുടെ മൊബൈൽ ഫോണുകൾ ഹാജരാക്കിയതെന്ന് സുപ്രീംകോടതി നിയുക്ത വിദഗ്‌ധ സമിതി അറിയിച്ചിരുന്നു.

അതിനാൽ ഫോൺ ചോർത്തിയതായി തെളിയിക്കുന്നതിന് ന്യായമായ കാരണങ്ങളുള്ളവർ ഫെബ്രുവരി എട്ടിനോ അതിന് മുമ്പോ മുന്നോട്ട് വരാനും പാനലുമായി ബന്ധപ്പെടാനും സമിതി വീണ്ടും ആവശ്യപ്പെടുകയായിരുന്നു.