Video | ബൈക്ക് യാത്രികനെ റോഡിലൂടെ വലിച്ചിഴച്ച് കാർ ഡ്രൈവർ ; ക്രൂരതയുടെ നടുക്കുന്ന വീഡിയോ

ബൈക്ക് യാത്രികനെ ഇടിച്ചിട്ട ശേഷം കടന്നുകളയാൻ ശ്രമിച്ച കാർ ഡ്രൈവറെ തടയാൻ ശ്രമിക്കുമ്പോഴായിരുന്നു സംഭവം

പട്‌ന: ബൈക്ക് യാത്രികനെ കാർ ഡ്രൈവർ റോഡിലൂടെ വലിച്ചിഴച്ചത് 100 മീറ്ററോളം. പട്‌ന നാഗേശ്വർ കോളനി ജങ്‌ഷന് സമീപത്തായിരുന്നു സംഭവം. കാറും ബൈക്കും തമ്മിൽ കൂട്ടിയിടിച്ചതിൽ ബൈക്ക് യാത്രികന് സാരമായ പരിക്കേറ്റിരുന്നു.

റോഡിൽ തെറിച്ചുവീണ അദ്ദേഹം കാറിനടുത്തെത്തി ഡ്രൈവറോട് തന്നെ ആശുപത്രിയിലെത്തിക്കാൻ ആവശ്യപ്പെട്ടു. എന്നാൽ ഇയാളെ സഹായിക്കുന്നതിന് പകരം കാർ ഡ്രൈവർ കടന്നുകളയാൻ ശ്രമിക്കുകയായിരുന്നു.

പോകാനനുവദിക്കാതെ തടയാന്‍ ശ്രമിച്ച ബൈക്ക് യാത്രികനെ കാര്‍ ഡ്രൈവര്‍ 100 മീറ്ററോളം റോഡിലൂടെ വലിച്ചിഴച്ചു. ശേഷം കാറുമായി ഡ്രൈവർ കടന്നുകളഞ്ഞു. തെറിച്ചുവീണ ബൈക്ക് യാത്രികൻ തൽക്ഷണം ബോധരഹിതനായി.

നാട്ടുകാർ ചേർന്ന് ഇയാളെ സമീപത്തെ ആശുപത്രിയിൽ പ്രവേശിപ്പിച്ചു. പ്രദേശത്തുണ്ടായിരുന്നവർ പകർത്തിയ, സംഭവത്തിന്‍റെ ദൃശ്യങ്ങള്‍ സമൂഹമാധ്യമങ്ങളില്‍ ചർച്ചയാവുകയാണ്.