യോഗത്തിന് ഓൺലൈനായി ഹാജരാകാമെന്ന് ഫേസ്ബുക്ക്; നിരസിച്ച് പാർലമെന്‍ററി സമിതി

ഒരു മീറ്റിംഗും ഓൺലൈനിൽ നടത്താൻ കഴിയില്ലെന്നും ഫേസ്ബുക്ക് ഉദ്യോഗസ്ഥർ നേരിട്ട് ഹാജരാകണമെന്നും സമിതിയിലെ എല്ലാ അംഗങ്ങളും വ്യക്തമാക്കി.

ന്യൂഡൽഹി: പാർലമെന്‍റ് സ്റ്റാൻഡിങ് കമ്മിറ്റിയുടെ മുമ്പാകെ നേരിട്ട് ഹാജരാകാൻ സാധിക്കില്ലെന്ന് ഫേസ്ബുക്ക് അറിയിച്ചു. വിർച്വൽ മീറ്റിംഗിലൂടെ ചർച്ചയിൽ പങ്കെടുക്കാമെന്നും ഫേസ്ബുക്ക് പറഞ്ഞു. എന്നാൽ ഫേസ്ബുക്കിന്‍റെ ആവശ്യം പാർലമെന്‍റ് സ്റ്റാൻഡിങ് കമ്മിറ്റി നിരസിച്ചു. യോഗത്തിന് പങ്കെടുക്കുന്ന ഉദ്യോഗസ്ഥർക്ക് വാക്സിനേഷൻ നൽകുമെന്നും സമിതി ഫേസ്ബുക്കിനോട് പറഞ്ഞു.

കടുപ്പിച്ച് സമിതി

മീറ്റിംഗ് തീയതി ഇതുവരെ തീരുമാനിച്ചിട്ടില്ല. യൂട്യൂബ്, ഗൂഗിൾ മുതലായ മറ്റ് വെബ് പ്ലാറ്റ്ഫോമുകളുടെയും അധികൃതർ നേരിട്ട് സമിതിക്ക് മുന്നിൽ ഹാജരാകണമെന്നും സമിതി അറിയിച്ചു. കൊവിഡ് സാഹചര്യത്തിൽ നേരിട്ടുള്ള മീറ്റിംഗുകളിൽ പങ്കെടുക്കാൻ കമ്പനിയുടെ നിയമങ്ങൾ അനുവദിക്കാത്തതുകൊണ്ട് കമ്മിറ്റിക്ക് മുന്നിൽ ഹാജരാകാൻ കഴിയില്ലെന്നാണ് ഫേസ്ബുക്ക് സമിതിക്ക് നൽകിയ മറുപടിയിൽ പറയുന്നത്. അതേസമയം, ഫേസ്ബുക്ക് അധികൃതർ ഓൺലൈനിൽ ഹാജരാകുമെന്നും അറിയിച്ചു. എന്നാൽ ഈ തീരുമാനത്തെ സമിതി തള്ളുകയായിരുന്നു.

യോഗം ഓൺലൈനിൽ നടത്തില്ല

ഫേസ്ബുക്കിന്‍റെ ഈ പ്രതികരണം കണക്കിലെടുത്ത് കമ്മിറ്റി ഇപ്പോൾ കർശനമായ നിലപാടാണ് സ്വീകരിച്ചിരിക്കുന്നത്. ഒരു മീറ്റിംഗും ഓൺലൈനിൽ നടത്താൻ കഴിയില്ലെന്നും ഫേസ്ബുക്ക് ഉദ്യോഗസ്ഥർ നേരിട്ട് ഹാജരാകണമെന്നും സമിതിയിലെ എല്ലാ അംഗങ്ങളും വ്യക്തമാക്കി. കമ്മിറ്റിക്ക് മുമ്പാകെ ഹാജരാകുന്ന ഉദ്യോഗസ്ഥരുടെ പട്ടിക നൽകിയാൽ ഇവർക്ക് കൊവിഡ് വാക്സിനേഷൻ നൽകാമെന്നും സമിതി അറിയിച്ചു. ഇതിന് ആവശ്യമായ സമയം അനുവദിക്കുമെന്നും സമിതി കൂട്ടിച്ചേർത്തു.

പാർലമെന്‍ററി പാനലിന്‍റെ തീരുമാനത്തിൽ ഫേസ്ബുക്ക് ഇതുവരെ മറുപടി നൽകിയിട്ടില്ല. വെള്ളിയാഴ്ച സമാനമായ കാര്യങ്ങളിൽ കമ്മിറ്റി ട്വിറ്റർ ഉദ്യോഗസ്ഥരെ വിളിക്കുകയും അവരുടെ രണ്ട് മുതിർന്ന ഉദ്യോഗസ്ഥരും നേരിട്ട് സമിതിക്ക് മുന്നിൽ ഹാജരാകുകയും ചെയ്തു.