ഭുവനേശ്വർ:ഒഡിഷയിൽ കേന്ദ്ര സായുധ പൊലീസ് സേനയെ വിന്യസിച്ചതിൽ കേന്ദ്രത്തിന് നൽകാനുള്ള 4,561 കോടി രൂപ ഒഴിവാക്കണമെന്ന് മുഖ്യമന്ത്രി നവീൻ പട്നായിക് പ്രധാനമന്ത്രി നരേന്ദ്ര മോദിയോട് ആവശ്യപ്പെട്ടു. രാജ്യത്ത് ഇടതുപക്ഷ തീവ്രവാദം വർധിക്കുന്നത് കേന്ദ്രവും സംസ്ഥാനസർക്കാരും സംയുക്തമായി ചേർന്ന് അഭിമുഖീകരിക്കേണ്ട പ്രശ്നമാണെന്നും, സംസ്ഥാന സർക്കാർ ഈ ഭീഷണിയെ വളരെ ശ്രമകരമായി നേരിടുന്നുണ്ടെന്നും പട്നായിക് വിശദീകരിച്ചു. അതിനാൽ കേന്ദ്രസേനയെ വിന്യസിക്കുന്നതിന് ഒഡിഷ സർക്കാരിന് ഈടാക്കിയ തുക എഴുതിത്തള്ളാൻ ആഭ്യന്തര മന്ത്രാലയത്തിന് നിർദേശം നൽകണമെന്നാണ് മുഖ്യമന്ത്രി നരേന്ദ്രമോദിക്ക് അയച്ച കത്തിൽ മുഖ്യമന്ത്രി ആവശ്യപ്പെട്ടത്.
രാജ്യത്തെ പല ഭാഗങ്ങളിലും നക്സൽ ആക്രമണ ഭീഷണിയുണ്ട്. ഇടതുപക്ഷ തീവ്രവാദം ഒരു ദേശീയ പ്രശ്നമായി മാറുകയാണെന്നും അത് രാഷ്ട്രത്തിന്‍റെ സമഗ്രതയ്ക്ക് ഗുരുതരമായ ആഭ്യന്തര സുരക്ഷാ ഭീഷണിയാണെന്നുമാണ് ഒഡിഷ മുഖ്യമന്ത്രി പ്രധാനമന്ത്രിക്ക് അയച്ച കത്തിൽ വ്യക്തമാക്കുന്നത്. സാമ്പത്തിക പ്രതിസന്ധി നേരിടുമ്പോഴും സുരക്ഷാ സേനയെ വിന്യസിക്കുന്നതിൽ ഒഡിഷ സർക്കാർ ശ്രദ്ധ ചെലുത്തുന്നുണ്ട്. ഇടതുപക്ഷ തീവ്രവാദത്തെ ചെറുക്കുന്നതിനായി 15ഓളം ബറ്റാലിയൻ പൊലീസുകാരെ കൂടി പുതിയതായി ഉൾപ്പെടുത്തി. കൂടാതെ, പൊലീസ് കേഡറിൽ 30,000 തസ്തികകൾ ഉൾപ്പെടുത്തിയെന്നും മുഖ്യമന്ത്രി നവീൻ പട്നായിക് കത്തിൽ വിശദീകരിച്ചു.