ഹാപ്പി ന്യൂഇയര്‍...! ആടിയും പാടിയും പുതുവര്‍ഷത്തെ വരവേറ്റ് രാജ്യം

India Welcomes 2024: പുതുവര്‍ഷത്തെ ആഘോഷങ്ങളോടെ സ്വീകരിച്ച് രാജ്യം. വിവിധ നഗരങ്ങളില്‍ ആയിരങ്ങള്‍ തടിച്ച് കൂടിയ ആഘോഷപരിപാടികള്‍ നടന്നു.

ഹൈദരാബാദ്: പുത്തന്‍ പ്രതീക്ഷകളോടെ പുതുവര്‍ഷത്തെ വരവേറ്റ് രാജ്യം. ആടിയും പാടിയും ആഘോഷത്തോടെയാണ് ജനം 2024നെ സ്വീകരിച്ചത് (India Welcomes New Year 2024). പലയിടങ്ങളിലും വൈകുന്നേരത്തോടെ ആരംഭിച്ച ആഘോഷ പരിപാടികള്‍ ഏറെ നേരം നീണ്ടുനിന്നു.

കനത്ത സുരക്ഷയിലാണ് രാജ്യത്തെ പ്രധാന നഗരങ്ങളിലെല്ലാം പുതുവത്സരാഘോഷങ്ങള്‍ നടന്നത്. മറൈന്‍ ഡ്രൈവിലായിരുന്നു (Mumbai Marine Drive) മുംബൈക്കാരുടെ പ്രധാന ആഘോഷങ്ങള്‍ (New Year Celebrations At Various Cities In India). ഡല്‍ഹിയിലെ കര്‍ത്തവ്യപഥിലും (Kartavya Path) കൊല്‍ക്കത്തയിലെ പാര്‍ക്ക് സ്ട്രീറ്റിലും (Park Street Kolkata) ബെംഗളൂരുവിലെ ബ്രിഗേഡ് റോഡിലും (Brigade Road Bengaluru) ഹൈദരാബാദിലെ ഹുസൈന്‍ സാഗറിലേക്കും (Hussain Sagar Hyderabad) ആയിരങ്ങളാണ് പുതുവത്സരാഘോഷങ്ങള്‍ക്കായെത്തിയത്.

ചെന്നൈ മറീന ബീച്ചും (Marina Beach Chennai) ആഘോഷ തിമിര്‍പ്പിലായിരുന്നു. ഗോവയിലെ പല സ്ഥലങ്ങളിലും ആഘോഷം കെങ്കേമമായി (New Year Celebrations At Goa). പതിവുപോലെ, കേരളത്തിലെ പ്രധാന ആഘോഷം ഫോര്‍ട്ട് കൊച്ചിയില്‍ തന്നെയായിരുന്നു.

പരേഡ് ഗ്രൗണ്ടില്‍ സ്ഥാപിച്ച പാപ്പാഞ്ഞിയെ കത്തിച്ച് കൊണ്ടായിരുന്നു ഫോര്‍ട്ട് കൊച്ചിയിലെത്തിയവര്‍ പുതിയ വര്‍ഷത്തെ സ്വീകരിച്ചത്. തിരുവനന്തപുരത്തെ മാനവീയം വീഥി, വര്‍ക്കല, കോവളം, ശംഖുമുഖം എന്നിവിടങ്ങളിലും ആളുകള്‍ തിങ്ങി നിറഞ്ഞ ആഘോഷങ്ങളാണ് നടന്നത്. കോഴിക്കോട്, ആലപ്പുഴ ഉള്‍പ്പടെയുള്ള നഗരങ്ങളിലും ആഘോഷങ്ങളുടെ മാറ്റിന് ഒട്ടും കുറവുണ്ടായിരുന്നില്ല.