അമരീന്ദര്‍ സിങ് X സിദ്ദു മഞ്ഞുരുകുമോ? എല്ലാ കണ്ണും ഹൈക്കമാൻഡില്‍

ആഴ്ചകളായി നീണ്ടു നില്‍ക്കുന്ന പഞ്ചാബിലെ കോണ്‍ഗ്രസ് തര്‍ക്കം എന്താവും? അമരീന്ദര്‍ സിങിനെ അംഗീകരിക്കാൻ സിദ്ദു തയ്യാറാവുമോ. ഹൈക്കമാൻഡ് ഫോര്‍മുല സിദ്ദു അംഗീകരിക്കുമോ. രാഹുല്‍ ഗാന്ധിയുമായുള്ള കൂടിക്കാഴ്ചയുടെ വിശദാംശങ്ങള്‍ സിദ്ദുവോ രാഹുലോ പുറത്തു വിടാത്തത് എന്താണ്? പഞ്ചാബ് കോണ്‍ഗ്രസ് രാഷ്ട്രീയ തര്‍ക്കം തുടരുകയാണ്

ന്യൂഡൽഹി:പഞ്ചാബ് കോൺഗ്രസിലെ പ്രശ്ന പരിഹാര ശ്രമം വേഗത്തിലാക്കി കോൺഗ്രസ് ഹൈക്കമാൻഡ്. മുഖ്യമന്ത്രി അമരീന്ദർ സിങ്ങുമായുള്ള തർക്കത്തിൽ നവജോത് സിങ് സിദ്ദു കോൺഗ്രസ് നേതാവ് രാഹുൽ ഗാന്ധിയുമായി ഡൽഹിയിൽ കൂടിക്കാഴ്‌ച നടത്തി. രാഹുൽ ഗാന്ധിയുടെ വസതിയിൽ നടന്ന കൂടിക്കാഴ്‌ചയെ സംബന്ധിച്ച് നവജോത് സിങ് സിദ്ദുവോ, കോൺഗ്രസോ പ്രതികരിച്ചില്ല.

ഹൈക്കമാൻഡ് ഇടപെടല്‍

2022ലെ നിയമസഭ തെരഞ്ഞെടുപ്പിന് മുന്നോടിയായി സംസ്ഥാന കോൺഗ്രസിൽ നടത്തേണ്ട നവീകരണം യോഗത്തിൽ ചർച്ചയായെന്നാണ് റിപ്പോർട്ട്. ബുധനാഴ്‌ച സിദ്ദു കോൺഗ്രസ് ജനറൽ സെക്രട്ടറി പ്രിയങ്ക ഗാന്ധിയുമായി കൂടിക്കാഴ്‌ച നടത്തിയിരുന്നു. പഞ്ചാബ് സർക്കാരിൽ മന്ത്രിസ്ഥാനവും പാർട്ടി പ്രചാരണ സമിതി മേധാവി സ്ഥാനവും സിദ്ദുവിന് വാഗ്‌ദാനം ചെയ്‌തതായാണ് പുറത്തു വരുന്ന റിപ്പോർട്ടുകൾ. പഞ്ചാബ് മുഖ്യമന്ത്രി അമരീന്ദർ സിങ്ങുമായി ഒരുമിച്ച് പ്രവർത്തിക്കുന്നതിലെ അതൃപ്‌തി സിദ്ദു വ്യക്തമാക്കിയിരുന്നു.

മുഖ്യമന്ത്രിയും സിദ്ധുവും തമ്മിലുള്ള പ്രശ്നം പരിഹരിക്കുന്നതിനായി രാഹുൽ ഗാന്ധി കഴിഞ്ഞ കുറച്ചു ദിവസങ്ങളായി കോൺഗ്രസ് എം‌എൽ‌എമാർ, എം‌പിമാർ, പഞ്ചാബിലെ പ്രമുഖ നേതാക്കൾ എന്നിവരുമായി നിരന്തര ചർച്ചയിലായിരുന്നു. പാർട്ടിയുടെ പഞ്ചാബ് യൂണിറ്റിലെ വിഭാഗീയത അവസാനിപ്പിക്കാൻ സോണിയ ഗാന്ധി മൂന്നംഗ സമിതി രൂപീകരിച്ചിരുന്നു.

പഞ്ചാബില്‍ ഏകാധിപത്യമോ

കഴിഞ്ഞ കുറച്ച് ദിവസങ്ങളായി പഞ്ചാബ് കോൺഗ്രസിൽ പൊട്ടിത്തെറി രൂക്ഷമാണ്. മുഖ്യമന്ത്രി അമരീന്ദർ സിങ്ങിനെതിരെ രൂക്ഷ വിമർശനവുമായി പ്രമുഖ നേതാവ് നവജ്യോത് സിങ് സിദ്ദു രംഗത്തിറങ്ങിയ സാഹചര്യത്തിൽ, അമരീന്ദറിനെ ഹൈക്കമാൻഡ് ഡൽഹിലേക്കു വിളിപ്പിച്ചിരുന്നു. അമരീന്ദറിനെ തള്ളിപ്പറഞ്ഞ് സിദ്ദു രംഗത്തെത്തിയതോടെ, സംസ്ഥാന കോൺഗ്രസ് രാഷ്ട്രീയം പ്രതിസന്ധിയിലായി. അടുത്ത വർഷം തെരഞ്ഞെടുപ്പ് നടക്കാനിരിക്കെ, ഇരു നേതാക്കളെയും ഒപ്പം നിർത്താനാണ് നേതൃത്വം ശ്രമിക്കുന്നത്.

‘കോൺഗ്രസ് എന്നാൽ അമരീന്ദർ സിങ് അല്ല. കോൺഗ്രസിൽ എന്‍റെ മുന്നിലെ വാതിലുകൾ അടഞ്ഞെന്ന് പറയാൻ അദ്ദേഹം ആരാണ്? ഏകാധിപത്യ ഭരണമാണു പഞ്ചാബിൽ നടക്കുന്നത്.’ എന്നായിരുന്നു നവജ്യോത് സിങ് സിദ്ദുവിന്‍റെ പരാമർശം. പഞ്ചാബിലെ പാർട്ടി നയത്തിലും ഭരണ നയത്തിലും സമ്പൂർണ അഴിച്ചു പണിവേണമെന്നാണ് സിദ്ദുവിന്‍റെ നിലപാട്. രണ്ടു സുപ്രധാന കുടുംബങ്ങളുടെ നിഴലിലും കീഴിലുമാണ് പാർട്ടിയും സംസ്ഥാനത്തിന്‍റെ ഭരണവുമെന്നും സിദ്ദു തുറന്നടിച്ചിരുന്നു.